காட்டேஜ் , தங்கும் விடுதி உரிமையாளா்கள் விதிமுறைகளை பின்பற்றுவது கட்டாயம்! காவல்துறை அறிவுரை

காட்டேஜ் மற்றும் தங்கும் விடுதி உரிமையாளா்கள் கட்டாயம் விதிமுறைகளை பின்பற்ற வேண்டுமென காவல் துறை சாா்பில் அறிவுறுத்தப்பட்டுள்ளது.

காட்டேஜ் மற்றும் தங்கும் விடுதி உரிமையாளா்களுக்கான கூட்டம், காவல்துறை சாா்பில் வால்பாறையில் திங்கள்கிழமை நடைபெற்றது. வால்பாறை காவல்நிலைய ஆய்வாளா் செல்வம் தலைமை வகித்தாா்.

இதில் அனைத்து காட்டேஜ் மற்றும் தங்கும் விடுதிகளின் முன்பகுதியில் கட்டாயம் கண்காணிப்பு கேமரா பொருத்தப்பட வேண்டும். விடுதிகளில் தங்கி செல்வோரின் முகவரி, பெறப்படும் அடையாள அட்டை குறித்த பதிவேடுகளை காவல்நிலையத்தில் காண்பித்து கையொப்பம் பெற வேண்டும்.

வன விலங்கு காண்பிப்பதாகக் கூறி இரவு நேரம் வாகனங்களில் அழைத்துச் சென்றால் நடவடிக்கை எடுக்கப்படும் உள்பட பல்வேறு விதிமுறைகள் குறித்து காவல்துறை சாா்பில் விளக்கப்பட்டது.