தோ்வு முறைகேடுகளால் 22 லட்சம் மாணவா்கள் பாதிப்பு: இந்திய மாணவா் சங்க அகில இந்திய தலைவா்

நாடு முழுவதும் தோ்வு முறைகேடுகளால் 22 லட்சத்துக்கும் மேற்பட்ட மாணவா்கள் பாதிக்கப்பட்டிருப்பதாக இந்திய மாணவா் சங்கத்தின் அகில இந்திய தலைவா் ஆதா்ஷ் எம்.சஜி குற்றஞ்சாட்டியுள்ளாா்.

கோவையில் நீட் தோ்வுக்கு எதிா்ப்பு தெரிவித்தும், கல்வி சமத்துவத்தை வலியுறுத்தியும் இந்திய மாணவா் சங்கம், இந்திய ஜனநாயக வாலிபா் சங்கம் ஆகியவை சாா்பில் செவ்வாய்க்கிழமை கண்டனப் பேரணி நடைபெற்றது. நீட் தோ்வால் உயிரிழந்த மாணவி அனிதாவின் நினைவு நாளையொட்டி நடத்தப்பட்ட இப்பேரணி, காந்திபுரம் மகளிா் பாலிடெக்னிக் கல்லூரி வளாகம் அருகே தொடங்கி வி.கே.கே.மேனன் சாலையில் நிறைவடைந்தது.

இதைத்தொடா்ந்து அங்கு திறந்தவெளி கருத்தரங்கு நடைபெற்றது. இந்திய மாணவா் சங்கத்தின் அகில இந்தியத் தலைவா் ஆதா்ஷ் எம்.சஜி, ஜனநாயக வாலிபா் சங்க மாநில துணைத் தலைவா் முகேஷ் ஆகியோா் தலைமை வகித்தனா்.

பேரணியில் பங்கேற்ற மாணவ, மாணவிகள், மருத்துவக் கல்விக்கான நீட் நுழைவுத் தோ்வை ரத்து செய்ய வேண்டும், தேசியத் தோ்வு முகமையை கலைக்க வேண்டும், சமூக நீதியைப் பாதுகாக்க வேண்டும் என்பது உள்ளிட்ட கோரிக்கைகளை வலியுறுத்தி பதாகைகள் ஏந்திச் சென்றனா்.

பின்னா் செய்தியாளா்களிடம் ஆதா்ஷ் எம்.சஜி கூறும்போது, ‘தேசியத் தோ்வு முகமையானது தற்போது மாணவா்களை வதைக்கும் முகமையாக மாறிவிட்டது.

தொடா் வினாத்தாள் கசிவு, முறைகேடுகளால் நாடு முழுவதும் 22 லட்சத்துக்கும் மேற்பட்ட மாணவா்கள் பாதிக்கப்பட்டுள்ளனா். மத்திய பாஜக அரசு தனியாா் பெருநிறுவனங்களுக்கு ஆதரவாகச் செயல்பட்டு, ஏழை, எளிய மாணவா்களின் மருத்துவக் கனவைச் சிதைக்கிறது.

அரசுப் பள்ளிகள் தொடா்ந்து நலிவடைந்துவரும் நிலையில், மறுபுறம் கல்வி தனியாா்மயமாகி வருகிறது. நீட் தோ்வை முற்றிலும் ரத்து செய்யும் வரையிலும், என்டிஏ அமைப்பைக் கலைக்கும் வரையிலும் மாணவா்களின் போராட்டம் ஓயாது என்றாா்.