ஆள் கடத்தல் வழக்கு: பெருந்துறை நீதிமன்றத்தில் யுவராஜ் ஆஜர்

பெருந்துறை, வெள்ளோடு காவல் நிலையங்களில் பதிவு செய்யப்பட்ட ஆள் கடத்தல் வழக்குத் தொடர்பாக பெருந்துறை நீதிமன்றத்தில் யுவராஜ் வியாழக்கிழமை ஆஜர்படுத்தப்பட்டார்.

சேலம் மாவட்டம், அக்கம்மா காலனியைச் சேர்ந்த சுப்பிரமணி மகன் யுவராஜ் (40). இவர் மீது 2013-ஆம் ஆண்டு ஆள் கடத்தல் சம்பந்தமாக பெருந்துறை காவல் நிலையத்தில் 2 வழக்குகளும், வெள்ளோடு காவல் நிலையத்தில் ஒரு வழக்கும் பதிவு செய்யப்பட்டன. இந்த வழக்குகள் விசாரணை பெருந்துறை மாவட்ட உரிமையியல் மற்றும் நீதித்துறை நடுவர் நீதிமன்றத்தில் நடைபெற்று வருகின்றது.

இதற்கிடையே, திருச்செங்கோடு பொறியியல் கல்லூரி மாணவர் கோகுல்ராஜ் கொலை வழக்கில் யுவராஜ் கைது செய்யப்பட்டு வேலூர் சிறையில் அடைக்கப்பட்டுள்ளார்.

இந்நிலையில், ஆள் கடத்தல் தொடர்பான வழக்கு தொடர்பாக பெருந்துறை மாவட்ட உரிமையியல் மற்றும் நீதித்துறை நடுவர் நீதிமன்றத்தில் வியாழக்கிழமை நடைபெற்ற விசாரணையில் ஆஜர்படுத்துவதற்காக வேலூர் சிறையில் இருந்து யுவராஜ் அழைத்துவரப்பட்டார். பலத்த பாதுகாப்புடன் யுவராஜை, பெருந்துறை நீதிமன்றத்தில் போலீஸார் வியாழக்கிழமை ஆஜர்படுத்தினர்.

இந்நிலையில், வழக்கை விசாரித்த நீதிபதி ரேய்கான்பர்வீன், வரும் 18-ஆம் தேதி மீண்டும் யுவராஜை ஆஜர்படுத்த உத்தரவிட்டார்.