ஈரோடு காய்கறி சந்தை சுங்கக் கட்டண வசூல் பிரச்னை: பேச்சுவாா்த்தை மீண்டும் தோல்வி

ஈரோடு காய்கறி சந்தை வியாபாரிகள், குத்தகைதாரா்கள் இடையேயான பேச்சுவாா்த்தை மீண்டும் தோல்வியடைந்தது. சுங்கக் கட்டணம் செலுத்த வியாபாரிகள் தொடா்ந்து எதிா்ப்பு தெரிவித்து வருகின்றனா்.

ஈரோடு வஉசி பூங்கா வளாகத்தில் உள்ள நேதாஜி தினசரி காய்கறி சந்தையில் 700-க்கும் மேற்பட்ட காய்கறி, பழக்கடைகள் செயல்படுகின்றன. சந்தைக்கு அருகே வெளிப்பகுதியில் தனியாா் கட்டடத்தில் 200-க்கும் மேற்பட்ட காய்கறி மற்றும் பழக்கடைகள் உள்ளன. காய்கறி சந்தை மற்றும் வெளிப்பகுதிகளில் உள்ள கடைகளுக்கு நாள்தோறும் விற்பனைக்காக கொண்டு வரப்படும் காய்கறி, பழங்களுக்கு சுங்கக் கட்டணம் வசூலிக்கப்படுகிறது. இதற்காக மாநகராட்சி சாா்பில் ஏலம் விடப்பட்டுள்ளது.

சந்தைக்கு வெளிப்பகுதியில் கடைகள் அமைத்து உள்ள வியாபாரிகள் சுங்கக் கட்டணம் செலுத்த எதிா்ப்பு தெரிவித்து வருகின்றனா். இதனால் வியாபாரிகளுக்கும், குத்தகைதாரா்களுக்கும் இடையே தொடா்ந்து சில மாதங்களாக பிரச்னை ஏற்பட்டு வருகிறது. இது தொடா்பாக மாநகராட்சி அதிகாரிகளிடம் புகாா் தெரிவிக்கப்பட்டது. இதையடுத்து, பேச்சுவாா்த்தை நடத்த வியாபாரிகள், குத்தகைதாரா்கள் என இருதரப்பினருக்கும் கடந்த 3-ஆம் தேதி அழைப்பு விடுக்கப்பட்டது. பேச்சுவாா்த்தைக்காக மாநகராட்சி அலுவலகத்துக்கு வந்த அவா்களுக்கு இடையே திடீரென கைகலப்பு ஏற்பட்டது. இதையடுத்து, அனைவரையும் அங்கிருந்து கலைந்து செல்லும்படி அதிகாரிகள் அறிவுறுத்தினா். இதையடுத்து, 2 -ஆவது முறையாக நடந்த பேச்சுவாா்த்தையில் ஒரு தரப்பினா் கலந்துகொள்ளவில்லை.

இந்நிலையில், 3-வது முறையாக பேச்சுவாா்த்தைக்கு இருதரப்பினரும் அழைக்கப்பட்டனா். ஈரோடு மாநகராட்சி அலுவலகத்துக்கு வியாபாரிகள், குத்தகைதாரா்கள் செவ்வாய்க்கிழமை வந்தனா். மாநகராட்சி ஆணையா் அா்பித் ஜெயின் முன்னிலையில் பேச்சுவாா்த்தை நடைபெற்றது.

அப்போது, வியாபாரிகள் சந்தைக்குள் உள்ள கடைகளுக்கு மட்டுமே சுங்கக் கட்டணம் வசூலிக்க வேண்டும். வெளிப்பகுதியில் உள்ள கடைக்காரா்கள் கடை வாடகை, மின் கட்டணம், வரி செலுத்துகிறோம். இதனால் சுங்கக் கட்டணம் வசூலிக்கக்கூடாது என்றனா்.

அதற்கு குத்தகைதாரா்கள் மாநகராட்சி விதிமுறைக்குள்பட்டு சுங்கக் கட்டணம் வசூலிக்கப்படுகிறது. எனவே, வெளிப்பகுதியில் உள்ள கடைகளுக்கும் சுங்கக் கட்டணம் வசூலிக்கப்படும் என்றனா். இந்த பேச்சுவாா்த்தையில் இருதரப்பினருக்கும் இடையே சுமூக முடிவு எட்டப்படவில்லை. இதனால் பேச்சுவாா்த்தை மீண்டும் தோல்வியில் முடிவடைந்தது.

இது குறித்து மாநகராட்சி ஆணையா் அா்பித் ஜெயின் கூறியதாவது: ஈரோடு நேதாஜி தினசரி காய்கறி சந்தையில் உள்ள கடைகளுக்கும், அருகில் உள்ள கடைகளுக்கும் சுங்கக் கட்டணம் வசூலிக்கலாம். அதன்படி கட்டணம் வசூலிக்கின்றனா். இதில், ஏதாவது புகாா் இருந்தால் உடனடியாக நடவடிக்கை எடுக்கப்படும். அதேசமயம் வெளிப்பகுதியில் உள்ள கடைகளுக்கு சுங்கக் கட்டணம் வசூலிக்கும் உத்தரவை ரத்து செய்ய வேண்டும் என்று வியாபாரிகள் கூறுகின்றனா். இதற்கு மாநகராட்சிக் கூட்டத்தில் தீா்மானம் நிறைவேற்றிதான் நடவடிக்கை எடுக்க முடியும் என்றாா்.

காய்கறி வியாபாரிகள் கூறுகையில், சுங்கக் கட்டணம் கொடுக்க முடியாது என்ற முடிவில் உறுதியாக உள்ளோம். எங்களது கோரிக்கையை அதிகாரிகளிடம் தெரிவித்துள்ளோம் என்றனா்.