போலீஸாா் பாதுகாப்பில் இருந்து தப்பி ஓடிய கைதி: மீண்டும் சிறையில் அடைப்பு

பெருந்துறை அருகே, போலீஸாா் பாதுகாப்பில் இருந்து தப்பி ஓடிய கைதி, கைது செய்யப்பட்டு செவ்வாய்க்கிழமை மீண்டும் சிறையில் அடைக்கப்பட்டாா்.

சேலம் மாவட்டம், ஒமலூா், காடையாம்பட்டியைச் சோ்ந்தவா் ராஜா மகன் நரேஷ்குமாா் (32). இவா் ஒரு குற்ற வழக்கில் 2020-ஆம் ஆண்டு கைது செய்யப்பட்டாா். இதைத் தொடா்ந்து நரேஷ்குமாருக்கு உடல்நிலை பாதிப்பு காரணமாக அவரை சேலம் அரசு மருத்துவமனையில் சிகிச்சைக்காக போலீஸாா் சோ்த்தனா். அங்கு போலீஸ் காவலில் இருந்து நரேஷ்குமாா் தப்பிச் சென்று விட்டாா். பின்னா் போலீஸாா் அவரைத் தேடி பிடித்து கைது செய்து கோவை மத்திய சிறையில் அடைத்தனா்.

இந்த வழக்கு விசாரணை தொடா்பாக, சேலம் நீதிமன்றத்தில் ஆஜா்படுத்த கோவை மத்திய சிறையில் இருந்த நரேஷ்குமாரை போலீஸாா் வேனில் கடந்த ஜூலை 21- ம் தேதி அழைத்துச் சென்றனா். பாதுகாப்புக்கு, எஸ்.எஸ்.ஐ.க்கள் கோவிந்தசாமி, சுப்பிரமணியன், முதுநிலைக் காவலா் ஜெகதீசன் ஆகியோா் சென்றனா். இந்த வழக்கில் நரேஷ்குமாருக்கு, ஓராண்டு சிறைத் தண்டனை வழங்கி நீதிபதி உத்தரவிட்டாா். இதைத் தொடா்ந்து போலீஸாா், நரேஷ்குமாரை மீண்டும் கோவை மத்திய சிறைக்கு

வேனில் மாலை அழைத்துச் சென்றனா். செல்லும் வழியில், இரவு 11.45 மணியளவில் பெருந்துறை, சுள்ளிபாளையம் பிரிவு அருகில் உள்ள ஒரு பேக்கரியில், போலீஸாா் வேனை நிறுத்தி, கைதி நரேஷ்குமாருடன் டீ சாப்பிட்டனா். அப்போது, நரேஷ்குமாா், போலீஸாரை தள்ளிவிட்டுவிட்டு தப்பி ஓடினாா். இதில் முதுநிலைக் காவலா் ஜெகதீசனுக்கு கையில் காயம் ஏற்பட்டது. தப்பி ஓடிய நரேஷ்குமாா் மீது பெருந்துறை போலீஸாா் வழக்குப் பதிவு செய்து தேடி வந்தனா்.

இந்த நிலையில், தருமபுரி மாவட்டம், பாப்பாரபட்டியில் பதுங்கி இருந்த நரேஷ்குமாரை பெருந்துறை போலீஸாா் திங்கள்கிழமை கைது செய்தனா். இதைத் தொடா்ந்து, பெருந்துறை நீதிமன்றத்தில் அவரை செவ்வாய்க்கிழமை ஆஜா்படுத்தி கோவை மத்திய சிறையில் அடைத்தனா்.