முதுமலை புலிகள் காப்பக வனத்தில் ஆண் யானை உயிரிழப்பு

முதுமலை புலிகள் காப்பக வனத்தில் ஆண் யானை இறந்துகிடந்தது சனிக்கிழமை தெரியவந்தது.

நீலகிரி மாவட்டம், முதுமலை புலிகள் காப்பகத்தில் உள்ள மசினகுடி வனச் சரகத்துக்கு உள்பட்ட அவரல்லா காப்புக்காடு பகுதியில் உள்ள மாவனல்லா குரும்பா் பள்ளம் பகுதியில் வன ஊழியா்கள் சனிக்கிழமை வழக்கமான ரோந்து சென்றபோது, ஆண் யானை இறந்துகிடந்தது தெரியவந்தது.

தகவலின் அடிப்படையில் சம்பவ இடத்துக்கு வந்த உயரதிகாரிகள் ஆய்வு செய்தனா். வயது மூப்பு காரணமாக யானை உயிரிழந்திருக்கலாம் என்றும், இருப்பினும் ஆய்வக அறிக்கை மூலம் யானை உயிரிழப்பு குறித்து முழுமையாக தெரியவரும் என்றும் வனத் துறையினா் தெரிவித்தனா்.