சம்பளம் நிலுவை: அரசு மருத்துவமனை ஒப்பந்தத் தொழிலாளர்கள் போராட்டம்

சம்பளம் நிலுவை உள்ளிட்ட பல்வேறு கோரிக்கைகளை வலியுறுத்தி, திருப்பூர் அரசு மருத்துவமனை ஒப்பந்தத் தொழிலாளர்கள் வெள்ளிக்கிழமை ஆட்சியர் அலுவலகத்தை முற்றுகையிட்டு கோரிக்கை மனு அளித்தனர்.

   திருப்பூர் அரசு தலைமை மருத்துவமனையில், காவல், சுகாதாரம், குடிநீர்க் குழாய் பராமரிப்பு, சமையல் உள்ளிட்ட பல்வேறு பணிகளுக்கு ஒப்பந்தத் தொழிலாளர்கள் 114 பேர் சுழற்சி அடிப்படையில் பணியாற்றி வருகின்றனர். இவர்களுக்கு கடந்த 2 மாதங்களாக சம்பளம் வழங்கவில்லையாம்.

இந்நிலையில், சம்பளம் நிலுவையை பெற்றுத் தர வலியுறுத்தி, ஒப்பந்தத் தொழிலாளர்கள் ஆட்சியர் அலுவலகத்தை முற்றுகையிட்டு மாவட்ட வருவாய் அலுவலர் பிரசன்ன ராமசாமியிடம் மனு அளித்தனர். 

   நிலுவைச் சம்பளத்தை உடனே கொடுப்பதுடன், சம்பளம் வழங்கும் தேதியை நிர்ணயம் செய்யவேண்டும். பி.எப்., இஎஸ்ஐ பிடித்தங்களுக்கு ரசீது வழங்க வேண்டும். சம்பளத்துடன் கூடிய வார விடுப்பு வழங்க வேண்டும்.

  குறைந்தபட்ச ஊதியமாக ரூ. 15 ஆயிரம் வழங்க வேண்டும் ஆகிய கோரிக்கைகள் மனுவில் வலியுறுத்தப்பட்டது.

  மனு அளித்ததைத் தொடர்ந்து தொழிலாளர்கள், திருப்பூர் அரசு தலைமை மருத்துமனையில் உள்ளிருப்பு போராட்டத்தில் ஈடுபட்டனர். இவர்களிடம், ஒப்பந்ததாரர் சார்பில் பேச்சுவார்த்தை நடைபெற்றது. இதில், வரும் 29-ஆம் தேதி சம்பளம் வழங்குவதாக உறுதியளிக்கப்பட்டது. இதையடுத்து தொழிலாளர்கள் போராட்டத்தை கைவிட்டு, பணிக்கு சென்றனர்.