பல்லடம் நகராட்சி கடை வாடகையை 3 மாதங்களுக்கு ரத்து செய்ய கோரிக்கை

பல்லடம்: பல்லடம் நகராட்சிக்கு சொந்தமான வணிக வளாக கடை வாடகையை 3 மாதங்களுக்கு ரத்து செய்ய வேண்டும் என பல்லடம் வட்டார வியாபாரிகள் சங்கம் வலியுறுத்தியுள்ளது.

இதுகுறித்து அந்த சங்கத்தின் தலைவா் ஆனந்தா பி.செல்வராஜ், செயலாளா் விமல் பி.என்.பழனிசாமி, நிா்வாகிகள் தமிழக முதல்வருக்கு வியாழக்கிழமை அனுப்பியுள்ள மனு:

பல்லடம் நகராட்சிக்கு சொந்தமான வணிக வளாகத்தில் 40 கடைகள், தினசரி மாா்க்கெட்டில் 160 கடைகள் என மொத்தம் 200 கடைகளை ஏலம் எடுத்து வியாபாரம் நடத்தி வருகிறோம்.

கரோனா நோய்த்தொற்று காரணமாக ஊரடங்கு அமல்படுத்தியவுடன் கடைகளை மூடி விட்டு வியாபாரிகள் அனைவரும் வீடுகளிலேயே முடங்கியுள்ளோம்.

வியாபாரம் இல்லாததால் வருமானமும் பாதிக்கப்பட்டுள்ளது. அதனால் நகராட்சிக்கு செலுத்த வேண்டிய வாடகையை செலுத்த முடியாத நிலைக்கு வியாபாரிகள் தள்ளப்பட்டுள்ளனா்.

எனவே பாதிப்படைந்த வியாபாரிகளின் நலன் காக்க 3 மாத வாடகையை ரத்து செய்து உத்தரவிட வேண்டும் என அதில் குறிப்பிடப்பட்டுள்ளது.