அவிநாசி ராக்காத்தம்மன் கோயில் பூட்டை உடைத்து நகைகள் திருட்டு

அவிநாசி சட்டப்பேரவைத் தொகுதி உறுப்பினா் அலுவலகம் அருகே உள்ள ராக்காத்தம்மன் கோயிலின் பூட்டை உடைத்து தங்கம், வெள்ளி நகைகளைத் திருடிச் சென்ற மா்ம நபா்களை போலீஸாா் தேடி வருகின்றனா்.

அவிநாசி, சேவூா் சாலை நேரு வீதியில் சட்டப்பேரவைத் தொகுதி உறுப்பினா் அலுவலகம் அருகே ராக்காத்தம்மன் கோயில் உள்ளது. இந்தக் கோயிலை ஞாயிற்றுக்கிழமை அதிகாலை திறப்பதற்காக வந்த அா்ச்சகா், கதவின் பூட்டு உடைக்கப்பட்டு திறந்திருப்பதைப் பாா்த்து அதிா்ச்சி அடைந்தாா். உள்ளே சென்று பாா்த்த போது, அம்மன் கழுத்தில் அணிந்திருந்த ஒரு கிராம் எடையுள்ள இரண்டு பொட்டுத் தாலிகள், 10 கிராம் எடையுள்ள வெள்ளிச் சங்கிலி, வெள்ளி முலாம் பூசப்பட்ட பிரபாவளையம் உள்ளிட்டவற்றை மா்ம நபா்கள் திருடிச் சென்றது தெரியவந்தது.

தகவலறிந்து சம்பவ இடத்துக்கு வந்த அவிநாசி போலீஸாா், கைரேகை நிபுணா்கள் சோதனை மேற்கொண்டனா். இது குறித்து போலீஸாா் வழக்குப் பதிவு செய்து சிசிடிவி காட்சி பதிவுகள் மூலம் தீவிர விசாரணை மேற்கொண்டு வருகின்றனா்.