தருமபுரியில் கடையடைப்பு; மறியல்

முன்னாள் முதல்வர் கருணாநிதியின் மறைவையொட்டி, தருமபுரி நகரில் புதன்கிழமை அனைத்துக் கடைகளும் அடைக்கப்பட்டிருந்தன.
தருமபுரி புறநகர், நகரப் பேருந்து நிலையங்கள், கடைவீதி, நான்கு சாலைச் சந்திப்பு, பென்னாகரம் சாலை, திருப்பத்தூர் சாலை, கிருஷ்ணகிரி சாலை, பாரதிபுரம், ஒட்டப்பட்டி உள்ளிட்ட அனைத்துச் சாலைகளிலுள்ள கடைகளும் அடைக்கப்பட்டிருந்தன. உணவகங்கள், தேநீர் கடைகளும்கூட மாலை 6 மணி வரை திறக்கப்படவில்லை.  செவ்வாய்க்கிழமை இரவு முதல் நகரின் முக்கியப் பகுதிகளில் போலீஸார் பாதுகாப்புப் பணியில் நிறுத்தப்பட்டிருந்தனர். அசம்பாவித சம்பவங்கள் எதுவும் நடைபெறவில்லை.
அதேபோல,  பேருந்துப் போக்குவரத்தும் முற்றிலும் முடங்கியது.  ஆட்டோக்களும் ஓடவில்லை. இதனால் சாலைகள் வெறிச்சோடிக் கிடந்தன.  அரசுப் பேருந்துகளும் அந்தந்த பணிமனைகளிலேயே நிறுத்தி வைக்கப்பட்டதால்,  பேருந்து நிலையங்களும் வெறிச்சோடிக் காணப்பட்டன.
நல்லம்பள்ளியில் மறியல்
மெரீனாவில் கருணாநிதியின் உடலை அடக்கம் செய்ய வலியுறுத்தி, புதன்கிழமை காலை நல்லம்பள்ளி பகுதியில் சேலம் புறவழிச் சாலையில் திமுகவினர் திடீர் மறியல் போராட்டத்தில் ஈடுபட்டனர்.
இந்தப் போராட்டத்துக்கு, நல்லம்பள்ளி ஒன்றிய திமுக செயலர் ஏ.எஸ். சண்முகம் தலைமை வகித்தார்.  போலீஸாரின் பேச்சுவார்த்தைக்குப் பிறகு அனைவரும் கலைந்து சென்றனர்.