நீதிபதியை அவதூறாக பேசிய வழக்கு: பரமத்தி நீதிமன்றத்தில் யுவராஜ் ஆஜர்

நீதிபதியை அவதூறாகப் பேசியதாகத் தொடரப்பட்ட வழக்கில், யுவராஜ் பரமத்தி நீதிமன்றத்தில் வியாழக்கிழமை நேரில் ஆஜரானார்.
சேலம் மாவட்டம், ஓமலூரைச் சேர்ந்த பொறியியல் பட்டதாரி கோகுல்ராஜ் கொலை வழக்கில் கைதாகி, திருச்சி மத்திய சிறையில் அடைக்கப்பட்டுள்ள தீரன் சின்னமலை கவுண்டர் பேரவை தலைவர் யுவராஜ் கடந்த ஆண்டு டிசம்பர் மாதம் 19 ஆம் தேதி அவ் வழக்கு தொடர்பாக நாமக்கல் மாவட்ட முதன்மை அமர்வு நீதிமன்றத்தில் ஆஜர்படுத்தப்பட்டார்.
அப்போது நீதிமன்ற வளாகத்தில் நீதிபதியை பார்த்து ஆவேசமாக பேசினார். இதனையடுத்து, அவர் மீது வழக்கு தொடரப்பட்டது. இந்த வழக்கு தொடர்பாக பரமத்தி குற்றவியல் நீதித் துறை நடுவர் நீதிமன்றத்தில் வியாழக்கிழமை ஆஜர்படுத்தப்பட்டார். யுவராஜிடம் விசாரணை நடத்திய நீதிபதி தனபால் ஜூன் மாதம் 8ஆம் தேதி நாமக்கல் நீதிமன்றத்தில் ஆஜராகும்படி உத்தரவிட்டார்.