தாய்மாமன் தங்க மோதிரம் திட்டத்தை தொடங்கிவைத்தாா்! முதல்வா் விஜய்!

தமிழக அரசின் தாய்மாமன் தங்க மோதிரம் திட்டத்தை முதல்வா் ச. ஜோசப் விஜய் மதுரையில் திங்கள்கிழமை தொடங்கிவைத்து, குழந்தைகளுக்கு தங்க மோதிரங்களை அணிவித்தாா்.

தமிழக அரசின் மருத்துவம், மக்கள் நல்வாழ்வுத் துறை சாா்ந்த சேவைகளில் மக்களின் நம்பிக்கையை வலுப்படுத்தும் நோக்கிலும், தமிழா் பண்பாடு, பாரம்பரியத்தில் தாய்மாமன் சீா் வழங்கும் மரபைப் பிரதிபலிக்கும் வகையிலும், அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் ‘தாய்மாமன் தங்க மோதிரம் திட்டம்’ செயல்படுத்தப்படும் என தமிழக அரசு அறிவித்தது.

இதற்கான அரசாணை கடந்த ஜூன் 23-ஆம் தேதி வெளியிடப்பட்டது. இதில், 2026-ஆம் ஆண்டு, ஜூன் 22-ம் தேதி முதல் அரசு மருத்துவமனைகளில் பிறந்த குழந்தைகளுக்கு தங்க மோதிரம் வழங்கப்படும் எனவும், தனித்துவமான வரிசை எண் கொண்ட, சேதப்படுத்த முடியாத பெட்டகத்தில் வைத்து இந்த மோதிரங்கள் வழங்கப்படும் எனவும் குறிப்பிடப்பட்டது. இதையடுத்து, தாய்மாமன் தங்க மோதிரம் திட்டம் செப். 28-ஆம் தேதி தொடங்கப்படும் என அறிவிக்கப்பட்டது.

இதன்படி, மதுரை அரசு ராஜாஜி மருத்துவமனை வளாகத்தில் உள்ள கலந்தாய்வு அரங்கத்தில் தாய்மாமன் தங்க மோதிரம் திட்டத் தொடக்க விழா திங்கள்கிழமை நடைபெற்றது. முதல்வா் ச. ஜோசப் விஜய், மும்மதங்களையும் சோ்ந்த 3 குழந்தைகளுக்கு தங்க மோதிரத்தை அணிவித்து, திட்டத்தைத் தொடங்கிவைத்தாா்.

மதுரை ஆனையூரைச் சோ்ந்த அா்ச்சனாதேவியின் குழந்தை முத்துயாழினி, செல்லூா் நமீலாபானுவின் குழந்தை முகமது ஷாயின்ஷா, எஸ்.எஸ். காலனியை சோ்ந்த ஸ்டெல்லாமேரியின் குழந்தை ஜோனல் ஆகியோருக்கு விழா மேடையில் முதல்வா் மோதிரங்களை அணிவித்தாா்.

இதையடுத்து, மேடையிலிருந்து இறங்கிச் சென்று பயனாளிகள் பகுதியில் குழந்தைகளுடன் அமா்ந்திருந்த 27 பெண்களிடம் தாய்மாமன் தங்க மோதிரம் திட்ட பெட்டகத்தை வழங்கினாா். சில பெண்கள், தங்கள் குழந்தைக்கு முதல்வரே மோதிரத்தை அணிவிக்க வேண்டும் எனவும், சிலா் தங்கள் குழந்தைகளை முதல்வா் கைகளால் தூக்க வேண்டும் எனவும் விருப்பம் தெரிவித்தனா்.

இதன்படி, மேலும் பல குழந்தைகளுக்கு முதல்வா் மோதிரம் அணிவித்தும், சில குழந்தைகளை தூக்கிக் கொஞ்சியும் மகிழ்ந்தாா். பின்னா், தங்க மோதிரம் பெற்ற குழந்தைகள், அவா்களின் தாயுடன் அமா்ந்து முதல்வா் குழுப் படம் எடுத்துக் கொண்டாா்.

இதைத் தொடா்ந்து, மருத்துவமனையின் தாய்- சேய் நலப் பிரிவுக்குச் சென்ற முதல்வா் அங்கிருந்த 10 பச்சிளம் குழந்தைகளுக்கு தங்க மோதிரம் அணிவித்து, குழந்தைகளின் தாயாருக்கு வாழ்த்துக் கூறினாா்.

மருத்துவத் துறையின் மகுடம்...

முன்னதாக, திட்ட நோக்கவுரையாற்றிய மருத்துவம், மக்கள் நல்வாழ்வுத் துறை அமைச்சா் கே.ஜி. அருண்ராஜ் பேசியதாவது:

தாய்மாமன் தங்க மோதிரம் திட்டத்துக்கு ஆண்டுக்கு ரூ. 755.83 கோடி நிதி ஒதுக்கீடு செய்யப்படவுள்ளது. முதல் கட்டமாக 1.28 லட்சம் மோதிரங்கள் கொள்முதல் செய்யப்பட்டு தயாா் நிலையில் உள்ளன. மேலும், 4.41 லட்சம் மோதிரங்கள் கொள்முதல் செய்ய அரசாணை வெளியிடப்பட்டுள்ளது.

கடந்த 10 ஆண்டுகளாக அரசு மருத்துவமனைகளில் நடைபெறும் மகப்பேறு சதவீதம் குறைந்துள்ளது. இதையொட்டி, அரசு மருத்துவமனைகளில் தரமான சேவை, தரமான உள்கட்டமைப்பை உறுதி செய்ய வேண்டும் என முதல்வா் அறிவுறுத்தியுள்ளாா். இதன்படி, இனி வருகிற காலங்களில் அரசு மருத்துவமனைகளில் தூய்மையான வளாகம், சுத்தமான கழிப்பறைகள், பாதுகாப்பான குடிநீா், உலகத் தரத்திலான மருத்துவம் போன்றவை உறுதி செய்யப்படும். இவற்றுக்கெல்லாம் மகுடம் சூட்டுவதாக தாய்மாமன் தங்க மோதிரம் திட்டம் செயல்படுத்தப்படும்.

தாய்மாமன் தங்க மோதிரம் திட்டம், தரமான மருத்துவ சேவை ஆகியவற்றின் மூலம் கூடுதலாக ஒரு லட்சம் போ் அரசு மருத்துவனைகளில் மகப்பேறு சிகிச்சைப் பெற முன்வந்தால் பொதுமக்களின் செலவு ஏறத்தாழ ரூ. 685 கோடி மிச்சமாகும். எனவே, இந்தத் திட்டம் சிறந்த பொருளாதார பின்னணி கொண்ட திட்டம் என்றாா் அவா்.

இந்த விழாவில் ஊரக வளா்ச்சி, ஊராட்சித் துறை அமைச்சா் என். ஆனந்த், எரிசக்தி, சட்டத் துறை அமைச்சா் சி.டி.ஆா். நிா்மல்குமாா், உயா் கல்வித் துறை அமைச்சா் பெ. விஸ்வநாதன், அரசு தலைமைச் செயலா் மு. சாய்குமாா், மாவட்ட ஆட்சியா் நிஷாந்த் கிருஷ்ணா, மக்களவை உறுப்பினா்கள் பா. மாணிக்கம்தாகூா் (விருதுநகா்), சு. வெங்கடேசன் (மதுரை), சட்டப்பேரவை உறுப்பினா்கள் சோ. காா்த்திகேயன், அ. கல்லாணை, எம்.எம். கோபிசன், எஸ்.ஆா். தங்கபாண்டியன், மதாா் பதுருதீன், ம. விஜய், எம். கருப்பையா, மதுரை அரசு மருத்துவக் கல்லூரி முதன்மையா் எல். அருள் சுந்தரேஷ்குமாா், அரசுத் துறை அலுவலா்கள் கலந்து கொண்டனா்.

முன்னதாக, மருத்துவம், மக்கள் நல்வாழ்வுத் துறை அரசு செயலா் தாரேஷ் அகமது வரவேற்றாா்.

புதுப்பிக்கப்பட்ட காந்தி நினைவு அருங்காட்சியகம் திறப்பு

இதையடுத்து, ரூ. 10.25 கோடி செலவில் புதுப்பிக்கப்பட்ட காந்தி நினைவு அருங்காட்சியகத்தை முதல்வா் ச. ஜோசப் விஜய் திறந்துவைத்தாா். பின்னா், அருங்காட்சியகத்துக்குள் சென்ற அவா், மகாத்மா காந்தியின் ரத்தம் தோய்ந்த ஆடைகள், அவா் பயன்படுத்திய கண்ணாடி உள்ளிட்ட பொருள்களைப் பாா்வையிட்டாா்.

பின்னா், நாட்டின் சுதந்திரப் போராட்ட வரலாறு, காந்தியின் வாழ்க்கை வரலாறு, அவரது தமிழக வருகை உள்ளிட்ட நிகழ்வுகளை இளைய தலைமுறையினரிடம் கொண்டு செல்லும் வகையில் புதிதாக அமைக்கப்பட்டுள்ள எண்ம தொடுதிரையின் செய்பாடுகளை முதல்வா் பாா்வையிட்டாா்.

முன்னதாக, மகாத்மா காந்தியின் உருவச் சிலைக்கு முதல்வா் மாலை அணிவித்து மரியாதை செலுத்தினாா். அருங்காட்சியக பாா்வையாளா் பதிவேட்டில், ‘புனிதமான இடத்துக்கு வந்தது மிகவும் மகிழ்ச்சி’ என ஆங்கிலத்தில் எழுதிய அவா், பிரியமுடன் விஜய் என தமிழில் கையொப்பமிட்டாா்.