பரமக்குடி அருகே கார் மோதி  விவசாயி சாவு

பரமக்குடி அருகே வியாழக்கிழமை சாலையைக் கடக்க முயன்ற விவசாயி கார் மோதி உயிரிழந்தார்.
பரமக்குடி அருகே உள்ள பிய்யனேந்தல் கிராமத்தைச் சேர்ந்தவர் கருப்பையா மகன் சாத்தையா (45). விவசாயத் தொழிலாளியான இவர்  வீட்டிற்கு தேவையான பொருள்கள் வாங்க பரமக்குடி வருவதற்காக மதுரை-ராமேசுவரம் செல்லும் வெங்காளூர் விலக்கு சாலைக்கு சென்றுள்ளார். 
சாலையை கடக்க முயன்றபோது அவ்வழியாக வந்த கார் இவர் மீது மோதிவிட்டு நிற்காமல் சென்றுவிட்டது. இதில் பலத்த காயமடைந்த சாத்தையா பரமக்குடி அரசு மருத்துவமனைக்கு கொண்டு செல்லும் வழியில் உயிரிழந்தார். இதுகுறித்து பரமக்குடி நகர் காவல் நிலையத்தில் அவரது சகோதரர் முனியாண்டி அளித்த புகாரின் பேரில் போலீஸார் வழக்குப் பதிந்து விசாரித்து வருகின்றனர்.