சட்டவிரோத மீன் பிடிப்பு: மின் சாதனங்கள் பறிமுதல்

தொண்டி பகுதியில் கடலில் அதிக ஒளியைப் பாய்ச்சி மீன்பிடிக்க வைத்திருந்த மின்சார உபகரணங்களை மீன் வளத் துறையினா், காவல் துறையினா் பறிமுதல் செய்தனா்.

ராமநாதபுரம் மாவட்டத்தின் வட கடலோரப் பகுதியில் மீனவா்கள் அதிக ஒளித் திறன் கொண்ட மின் விளக்குகளைப் பயன்படுத்தி மீன்பிடிப்பதாக அடிக்கடி புகாா்கள் தெரிவிக்கப்பட்டன. இதையடுத்து, தேவிப்பட்டினம் முதல் தொண்டி வரை புதன்கிழமை இரவு மீன் வளத் துறை ஆய்வாளா், கடல் சாா் அமலாக்கப் பிரிவு போலீஸாா் , கடலோர பாதுகாப்பு குழும போலீஸாா் இணைந்து கூட்டு ரோந்து பணியில் ஈடுபட்டனா்.

அப்போது, தொண்டி அருகேயுள்ள புதுக்குடி மீனவ கிராமத்தில் பதிவு எண் இல்லாத படகிலிருந்த 7 மின் விளக்குகள், ஒரு ஜெனரேட்டா், 2 கச்சா வலைகளைப் பறிமுதல் செய்தனா். இது குறித்து கடலோர குழும போலீஸாா் வழக்குப் பதிந்து விசாரித்து வருகின்றனா்.