இடைக்காட்டூா் திரு இருதய ஆண்டவா் திருத்தல சீரமைப்பு பணிகள்: தமிழக சிறுபான்மை ஆணைய அதிகாரி ஆய்வு

சிவகங்கை மாவட்டம், மானாமதுரை ஒன்றியம், இடைக்காட்டூரில் அமைந்துள்ள திரு இருதய ஆண்டவா் திருத்தலத்தில் அரசு நிதியுதவியுடன் நடைபெற்று வரும் சீரமைப்புப் பணிகளை தமிழக சிறுபான்மை ஆணையத்தின் செயல் அதிகாரி ஆஷா மரியம் வெள்ளிக்கிழமை நேரில் பாா்வையிட்டு ஆய்வு செய்தாா்.

இடைக்காட்டூா் திரு இருதய ஆண்டவா் திருத்தலத்தை சீரமைப்பதற்காக தமிழக சிறுபான்மை ஆணையத்தின் மூலம் தமிழக அரசு ரூ. 1.52 கோடி நிதியை வழங்கியது. இந்த நிதியின் மூலம் தற்போது திருத்தலத்தில் சீரமைப்பு பணிகள் நடைபெற்று வருகின்றன. இந்த நிலையில், தமிழக சிறுபான்மை ஆணையத்தின் செயல் அதிகாரி ஆஷா மரியம் இடைக்காட்டூா் திரு இருதய ஆண்டவா் திருத்தலத்துக்கு வந்து அங்கு நடைபெறும் சீரமைப்புப் பணிகளை நேரில் பாா்வையிட்டு ஆய்வு செய்தாா். முன்னதாக அவரை திருத்தல அதிபா் ஜான் வசந்தகுமாா் வரவேற்று சீரமைப்பு பணிகள் குறித்து விளக்கினாா். அப்போது மாவட்ட சிறுபான்மை நல அலுவலா் ராஜா சிங், மானாமதுரை வட்டாட்சியா் ராஜா,பொறியாளா் ராஜேந்திரன் ஆகியோா் உடனிருந்தனா்.