நடுவழியில் பேருந்து பழுதாகி நின்றதால் மலை கிராம பள்ளி மாணவா்கள் அவதி

போடி அருகே மலைக் கிராமத்துக்குச் செல்லும் அரசுப் பேருந்து நடுவழியில் பழுதாகி நின்ால் விவசாயத் தொழிலாளா்கள், பள்ளி மாணவா்கள் அவதியடைந்தனா்.

போடி அருகே குரங்கணி, கொட்டகுடி மலைக் கிராமங்கள் உள்ளன. போடியிலிருந்து 16 கி.மீ. தொலைவில் இந்த மலை கிராமங்கள் அமைந்துள்ளன. இதில் கொட்டகுடியிலிருந்து 50-க்கும் மேற்பட்ட பள்ளி மாணவா்களும், குரங்கணியைச் சோ்ந்த 60-க்கும் மேற்பட்ட பள்ளி மாணவா்களும் போடியில் உள்ள பள்ளிகளில் படித்து வருகின்றனா். தொடக்கத்தில் போடியிலிருந்து குரங்கணிக்கு மட்டும் அரசுப் பேருந்து இயக்கப்பட்டு வந்தது. கொட்டகுடி மலை கிராமத்துக்கு செல்பவா்கள் இந்தப் பேருந்தில் சென்று கொட்டகுடி விலக்கில் இறங்கி அங்கிருந்து 2 கி.மீ. தொலைவு நடந்து செல்ல வேண்டும்.

இந்த நிலையில், போடி கொட்டக்குடி மலைக் கிராம மக்களின் 30 ஆண்டு கால கோரிக்கையை ஏற்று போடி- குரங்கணி செல்லும் பேருந்தை கொட்டகுடி மலை கிராமம் வழியாக இயக்க நடவடிக்கை எடுக்கப்பட்டது. இதற்காக மலைச் சாலைகளில் இயக்கப்படும் சிறிய ரக பேருந்து ஒன்றும் வரவழைக்கப்பட்டு கடந்த இரண்டு மாதங்களாக இயக்கப்பட்டு வருகிறது.

இந்த நிலையில், போடி- குரங்கணி, குரங்கணி- போடி என இயக்கப்பட்டு வந்த பேருந்து திங்கள்கிழமை பிற்பகல் 3 மணிக்கு போடியிலிருந்து குரங்கணி சென்றது. முந்தல் மலை கிராமத்தை கடந்ததும் பேருந்து பழுதாகி நடுவழியில் நின்று விட்டது. இதனால் போடியிலிருந்து கொட்டகுடி, குரங்கணி சென்ற பயணிகள் இறக்கிவிடப்பட்டனா்.

இந்த வழித்தடத்தில் வேறு பேருந்துகள் இல்லாததால் பயணிகள் ஆட்டோ, ஜீப்புகளில் கூடுதல் கட்டணம் செலுத்தி சென்றனா். இதனிடையே 3 மணிக்கு சென்றுவிட்டு மீண்டும் போடிக்கு வரும் இந்த பேருந்தில்தான் பள்ளி நிறைவடைந்ததும் மாணவா்கள் கொட்டகுடி, குரங்கணிக்கு செல்வா். இந்த நிலையில், பேருந்து வரும் என பேருந்து நிலையத்திலேயே காத்திருந்த மாணவா்கள், மலை கிராம மக்கள் ஏமாற்றமடைந்தனா்.

விசாரித்த போது பேருந்து பழுதாகி நடுவழியில் நிற்பது தெரியவந்ததும் அவா்கள் ஆட்டோ, ஜீப்புகளில் கூடுதல் கட்டணம் செலுத்தி பயணம் செய்தனா். சில மாணவா்கள் பேருந்து நிலையத்திலேயே காத்திருந்தனா். மாலை 6 மணிக்கு மேல் அந்தப் பேருந்து பழுது நீக்கப்பட்டு மீண்டும் இயக்கப்பட்டபோது காத்திருந்த மாணவா்கள், மலை கிராம மக்கள் அதில் ஏறி தாமதமாக சென்றனா். இதனால் அவா்கள் அவதியடைந்தனா்.