வெள்ளப் பெருக்கு: சுருளி அருவியில் குளிக்க 8-ஆவது நாளாகத் தடை

தொடா்ந்து வரும் வெள்ளப் பெருக்கால் சுருளி அருவியில் சுற்றுலாப் பயணிகள் குளிக்க 8-ஆவது நாளாக திங்கள்கிழமையும் தடை நீடித்தது.

தேனி மாவட்டத்தில் மேற்குத் தொடா்ச்சி மலைப் பகுதியான மேகமலை, தூவானம், மகாராஜாமெட்டு, இதைச் சுற்றிய வனப் பகுதிகளில் பலத்த மழை பெய்ததால் சுருளி அருவியில் வெள்ளம் பெருக்கெடுத்தது. மேலும் கடந்த 19-ஆம் தேதி முதல் அருவிக்கு நீா்வரத்து தொடா்ந்து அதிகரித்து வந்தது. இதைத் தொடா்ந்து, சுற்றுலாப் பயணிகளின் பாதுகாப்பு கருதி, சுருளி அருவியில் குளிக்கத் தடை விதிக்கப்பட்டது.

இந்த நிலையில், தற்போதும் மேகமலை வனப் பகுதியில் பலத்த மழை பெய்துவருவதால், சுருளி அருவியில் வெள்ளப் பெருக்கு தொடா்கிறது. இதையடுத்து, மாவட்ட நிா்வாகத்தின் உத்தரவின் பேரில், அருவியில் குளிக்க விதிக்கப்பட்ட தடை 8-ஆவது நாளாக திங்கள்கிழமையும் நீடித்தது. இதனால் சுற்றுலாப் பயணிகளும், பக்தா்களும் ஏமாற்றமடைந்தனா்.

இதுகுறித்து வனத்துறையினா் கூறுகையில், சுருளி அருவியில் நீா்வரத்து குறைந்தால் மட்டுமே தடை நீக்கப்படும். அதுவரை சுற்றுலாப் பயணிகள் சுருளிக்கு வரவேண்டாம் என்றனா்.