மதுபானக் கடை ஊழியரிடம் வழிப்பறி செய்தவர் கைது

சிவகாசியில் வியாழக்கிழமை மதுபானக் கடை ஊழியரிடம் வழிப்பறி செய்தவரை போலீஸார் கைது செய்தனர்.
   திருத்தங்கல் அருகே சுக்கிரவார்பட்டியைச் சேர்ந்தவர் தங்கப்பாண்டி(42). இவர் சிவகாசி-செங்கமலப்பட்டி சாலையில் உள்ள அரசு மதுபானக் கடையில் ஊழியராக வேலை செய்து வருகிறார். இந்நிலையில் இவர் சிவகாசி-செங்கமலப்பட்டி சாலையில் உள்ள திரையரங்கம் அருகே நடந்து சென்றபோது, மர்மநபர் கத்தியை காட்டி மிரட்டி, அவரது பையில் வைத்திருந்த ரூ.310-ஐ பறித்துக் கொண்டு தப்ப முயன்றார். அக்கம் பக்கத்தினர் உதவியோடு வழிப்பறி செய்தவரைப் பிடித்து தங்கப்பாண்டி போலீஸில் ஒப்படைத்தார். விசாரணையில், அவர் முத்துராமலிங்கம் காலனியைச் சேர்ந்த கருப்பசாமி(32) என்பது தெரிய வந்தது. இது குறித்த புகாரின் பேரில் சிவகாசி கிழக்கு போலீஸார் வழக்குப் பதிவு செய்து கருப்பசாமியை கைது செய்தனர்.