மயூர் விஹார் பேஸ்-3 கோயிலில் விநாயகர் சதுர்த்தி உத்ஸவம்

தில்லி மயூர் விஹார் பேஸ் 3-இல் உள்ள ஸ்ரீ இஷ்ட சித்தி விநாயகர் கோயிலில் விநாயகர் சதுர்த்தி உத்ஸவம் திங்கள்கிழமை (செப்டம்பர் 3) தொடங்கியது. இந்த நிகழ்ச்சி வரும் செப்டம்பர் 16-ஆம் தேதி வரை நடைபெற உள்ளது. 
இதையொட்டி, செப்டம்பர் 9 முதல் 12-ஆம் தேதி வரை வேத விற்பன்னர்களின் சிறப்பு கணபதி ஹோமம் நடைபெற உள்ளது. காலையிலும், மாலையிலும் பக்தர்களின் நன்மைக்காக 8 வேத பண்டிதர்களால் சிறப்பு வேத பாராயணம் நடைபெறும். அருள்மிகு இஷ்ட சித்தி விநாயகருக்கு செப்டம்பர் 3-ஆம் தேதி தொடங்கிய லட்சார்ச்சனை செப்டம்பர் 13-ஆம் தேதி முடிவடைகிறது. செப்டம்பர் 9-ஆம் தேதி காலை 7.30 மணி முதல் காலை 10.30 மணி வரை விஜய கணபதி ஹோமம், லட்சுமி கணபதி ஹோமம், ஏகவார ருத்ராபிஷேகம் நடைபெறும். செப்.10 முதல் 12-ஆம் தேதி வரை காலை 6.30 மணி முதல் 9.30 மணி வரை அதர்வஷீச ஹோமம், துர்கா கணபதி ஹோமம், அர்க்க கணபதி ஹோமம் நடைபெறும்.  செப்.13-ஆம் தேதி விநாயகர் சதுர்த்தி நாளில் காலை 6 மணிக்கு மகா கணபதி ஹோமமும், காலை 10 மணிக்கு மோதக சஹஸ்ரநாம அர்ச்சனையும், மாலை 5.30 மணிக்கு மூலவருக்கு சிறப்பு அலங்காரமும், இரவு 8.45 மணிக்கு மகா தீபாராதனையும் நடைபெறும். 
செப். 14-ஆம் தேதி மாலையில் இசைக் கலைஞர் அம்பிகா ஸ்ரீகாந்தின் மாணவர்கள் பங்கேற்கும் பக்தி இசை நிகழ்ச்சியும், செப்.15-ஆம் தேதி மாலையில் ருக்மணி மற்றும் குழுவினர் பங்கேற்கும் மகளிர் கோலாட்டம் நிகழ்ச்சியும் நடைபெறும். செப்.9 முதல் 12-ஆம் தேதி வரை ராஜ்சேகர ஸ்ரௌத்திகள்தலைமையிலான வேத பண்டிதர்கள் பங்கேற்கும் சதுர் வேத பாராயணம் நிகழ்ச்சி மாலை 6 மணி முதல் 8 மணிவரை நடைபெறும். செப்டம்பர் 16-ஆம் தேதி விநாயகரின் உத்ஸவர் ஊர்வலம் மாலை 6.30 மணிக்கு நடைபெறும். செப். 9 முதல் 16-ஆம் தேதி வரை தினமும் சிறப்பு அலங்காரங்களில் விநாயகர் அருள்பாலிக்க உள்ளார். இத்தகவலை ஸ்ரீஆதி சங்கர சேவா சமாஜத்தின் தலைவர் எஸ்.கிருஷ்ணசாமி தெரிவித்துள்ளார்.