தகுதி வாய்ந்தவர்களை வாக்காளர் பட்டியலில் சேர்க்க காங்கிரஸ் நிர்வாகிகள் சிறப்பாக பணியாற்ற வேண்டும்

குமரி மேற்கு மாவட்டத்தில் தகுதி வாய்ந்த வாக்காளர்களை வாக்காளர் பட்டியலில் சேர்க்க காங்கிரஸ் நிர்வாகிகள் சிறப்பாக பணியாற்ற வேண்டும் என குமரி மேற்கு மாவட்ட காங்கிரஸ் தலைவர் ராஜேஷ்குமார் எம்.எல்.ஏ. தெரிவித்துள்ளார்.
இதுகுறித்து அவர் வெளியிட்ட அறிக்கை: தமிழகத்தில் வாக்காளர்  பட்டியல் திருத்தம் செய்திட வரைவு வாக்காளர்  பட்டியலை தேர்தல் ஆணையம் வெளியிட்டுள்ளது. தகுதி வாய்ந்த வாக்காளர்களின் பெயர்களை சேர்த்தல்,  நீக்குதல்,  திருத்தங்கள், முகவரி  மாற்றம் உள்ளிட்ட பணிகளுக்காக செப். 1முதல் அக். 31ஆம் தேதி வரை கால அவகாசமும் வழங்கப்பட்டுள்ளது.
எனவே, அந்தந்த வாக்குச்சாவடிகளில் வரும் 9 மற்றும் 23ஆம் தேதிகளிலும், அக். 7 மற்றும் 14 ஆம் தேதிகளிலும் நடைபெறும் சிறப்பு முகாமில், காங்கிரஸ் நிர்வாகிகள்,  தங்கள் பகுதியில் 18 வயது நிரம்பியவர்களை வாக்காளர் பட்டியலில் சேர்க்க நடவடிக்கை எடுக்க வேண்டும். மேலும் இப்பணிகள் குறித்த விவரங்களை மாவட்ட காங்கிரஸ் அலுவலகத்தில் ஒப்படைக்க வேண்டும் என்றார் அவர்.