ஸ்ரீ நாராயண குருவிற்கு மருந்துவாழ் மலையில் மணிமண்டபம்: தமிழக அரசுக்கு கோரிக்கை

ஸ்ரீநாராயண குருவின் பெருமைகளைப் போற்றும் வகையில், கன்னியாகுமரி மருந்துவாழ் மலையில் அவருக்கு மணிமண்டபம் அமைக்க வேண்டும் என அரசுக்கு அனைத்திந்திய முதலியாா் பிள்ளைமாா் சங்கம் (எய்ம்பா) கோரிக்கை விடுத்தது.

ஆன்மிக குரு ஸ்ரீ நாராயண குருவின் 172 ஆவது ஜெயந்தி விழா, மருந்துவாழ் ஸ்ரீ நாராயண குரு தா்ம மடத்தில் வெள்ளிக்கிழமை நடைபெற்றது. ‘எய்ம்பா’ சாா்பில் நடைபெற்ற இந்நிகழ்வுக்கு, சங்கத் தலைவா் ஓம் சக்தி ராமச்சந்திரன் தலைமை வகித்தாா். மாநிலப் பொருளாளா் ரவி முதலியாா் முன்னிலை வகித்தாா். துணைத் தலைவா் ராமச்சந்திர குமாா் வரவேற்றாா்.

முன்னதாக, ஸ்ரீ நாராயண குரு தா்ம மடத்தின் செயலா் அரூபானந்த சுவாமி, ஸ்ரீமத் சிவ சொரூபானந்த சுவாமி ஆகியோா் வேள்வி பூஜைகளை தொடங்கி வைத்தனா். பின்னா், ஸ்ரீநாராயண குருவுக்கு சிறப்பு வழிபாடுகள், பூஜைகள் நடைபெற்றன. தமிழ்நாடு முழுவதும் இருந்து வந்த பக்தா்கள் அவருக்கு மலரஞ்சலி செலுத்தினா்.

இந்நிகழ்வுக்கு தலைமை வகித்த எய்ம்பா மாநிலத் தலைவா் ஓம்சக்தி ராமச்சந்திரன் பேசியதாவது; ‘கேரள மாநிலத்தில் பிறந்திருந்தாலும் தமிழா்களுக்கும் உரித்தானவா் ஸ்ரீநாராயண குரு. தேவாரம், திருவாசகத்தில் அவா் நிபுணத்துவம் பெற்றிருந்தாா்.

தமிழ்த்தாய் வாழ்த்துப் பாடலை இயற்றிய மனோன்மணீயம் சுந்தரனாரின் நெருங்கிய நண்பராகவும் இருந்தாா். இருவரும் தமிழ் மொழி குறித்து செழுமையான விவாதங்களை நடத்தியுள்ளனா். நாராயண குருவை போல வேறு ஒருவரை தன் வாழ்நாளில் கண்டதில்லை என்று தேசிய கீதம் இயற்றிய ரவீந்திரநாத் தாகூரும், நாராயண குருவை அவரது ஆசிரமத்தில் தங்கி, சந்தித்தது நான் பெற்ற பேறு என மகாத்மா காந்தியும் அவருக்குப் புகழாரம் சூட்டியுள்ளனா்.

ஸ்ரீநாராயண குரு ஜெயந்தி நாளில் தமிழகத்தில் அரசு விடுமுறை அளித்து அவருக்கு மரியாதை செலுத்த வேண்டும். அவா் சித்தி அடைந்த மருந்துவாழ் மலையில் மணிமண்டபம் அமைக்க வேண்டும். அதற்கு உரிய உதவிகளையும் வழங்க தயாராக இருக்கிறோம் என்றாா் அவா்.

இந்நிகழ்வில், எஸ்.என்.டி.பி. யூனியன் மணிகண்டன், எஸ்.என். ட்ரஸ்ட் நிா்மலன், ஸ்ரீ நாராயண குரு கல்வி மற்றும் பொதுசேவைகள் அறக்கட்டளைத் தலைவா் சிவசங்கரலிங்கம், தவெக குமரி கிழக்கு மாவட்டச் செயலா் எஸ்.ஆா்.மாதவன், குரு தா்ம பிரசார சபா மாநிலத் தலைவா் இளங்கோ உள்ளிட்டோா் வாழ்த்துரை வழங்கினா். தவெக பரப்புரைச் செயலா் நாஞ்சில் சம்பத் கருத்துரையாற்றினாா். விழா ஒருங்கிணைப்பாளா் மகேஷ் முத்துக்குமாா், அமைப்புச் செயலா் முருகேசன், செய்தி தொடா்பாளா் மு.ஆதவன் உள்ளிட்டோா் பங்கேற்றனா். சங்க அமைப்புச் செயலா் நித்திய குமாா் நன்றி கூறினாா்.