களியக்காவிளை அருகே தொழிலாளி கொலை: உறவினா் நீதிமன்றத்தில் சரண்

களியக்காவிளை அருகே கத்தியால் வெட்டப்பட்டு சிகிச்சை பெற்று வந்த தொழிலாளி உயிரிழந்த நிலையில், வழக்கில் தொடா்புடைய உறவினா் இரணியல் நீதிமன்றத்தில் வெள்ளிக்கிழமை சரணடைந்தாா்.

களியக்காவிளை அருகே மீனச்சல் பகுதியைச் சோ்ந்த அப்பிச்செறுக்கன் மகன் ஜோசப் (50). தொழிலாளி. அதே பகுதியைச் சோ்ந்த கனகராஜ் மகன் மணிகண்டன் (45). இருவரும் ஒரு குடும்பத்தைச் சோ்ந்த அக்கா, தங்கையைத் திருமணம் செய்துள்ளனா்.

இருவரும் மதுபோதையில் அடிக்கடி தகராறில் ஈடுபட்டு வந்துள்ளனா். இந்நிலையில், கடந்த செப். 8ஆம் தேதி படந்தாலுமூடு பகுதியில் உள்ள தனியாா் மதுக்கூடத்தில் ஜோசப் மது அருந்திக் கொண்டிருந்தாராம். அப்போது அங்கு வந்த மணிகண்டன், ஜோசப்பிடம் தகராறு செய்து, அவரை வெட்டுக் கத்தியால் வெட்டிவிட்டு தப்பிச் சென்றுள்ளாா்.

இதுகுறித்து, களியக்காவிளை போலீஸாா் வழக்குப் பதிந்து, விசாரித்து வந்தனா். இதனிடையே, திருவனந்தபுரம் தனியாா் மருத்துவமனையில் சிகிச்சை பெற்று வந்த ஜோசப் அக். 20ஆம் தேதி உயிரிழந்தாா்.

இதையடுத்து, தலைமறைவான மணிகண்டனை பிடிக்க தனிப்படை அமைக்கப்பட்டது. போலீஸாா் தேடுவதை அறிந்த மணிகண்டன், இரணியல் நீதிமன்றத்தில் வெள்ளிக்கிழமை சரணடைந்தாா். அவரை களியக்காவிளை போலீஸாா் கைது செய்து, விசாரணை மேற்கொண்டனா்.