மலையில் இருந்து குதித்து இளைஞர் தற்கொலை

தூத்துக்குடி மாவட்டம் கழுகுமலையில், வாழ்க்கையில் விரக்தியடைந்த இளைஞர் மலையில் இருந்து குதித்து புதன்கிழமை தற்கொலை செய்துகொண்டார். 
கழுகுமலை ஏ.பி.சி. நகரைச் சேர்ந்தவர் பரமசிவம் மகன் மாரிமுத்து (22). வெல்டிங் பட்டறையில் வேலை செய்து வந்த இவர், கடந்த சில நாள்களாக வேலைக்குச் செல்லாமல் இருந்து வந்தாராம். இதனால், அவரது பெற்றோர் மாரிமுத்துவை கண்டித்ததாகக் கூறப்படுகிறது. இந்நிலையில், புதன்கிழமை காலை 7 மணியளவில் வீட்டிலிருந்து வெளியே சென்ற இவர், புதிய பேருந்து நிலையம் எதிர்புறம் உள்ள மலைப்பகுதியில் இருந்து கீழே குதித்து தற்கொலை செய்துகொண்டார்.   
தகவல் அறிந்து சம்பவ இடத்திற்குச் சென்ற கழுகுமலை போலீஸார், சடலத்தை கைப்பற்றி கோவில்பட்டி அரசு மருத்துவமனைக்கு பிரேத பரிசோதனைக்கு அனுப்பி வைத்தனர். மேலும், இதுகுறித்து வழக்குப் பதிந்து விசாரணை நடத்தி வருகின்றனர்.