‘ஓட்டப்பிடாரம் அரசு மருத்துவமனையில் 24 மணி நேரமும் மருத்துவா்கள் பணியில் இருக்க நடவடிக்கை’

ஓட்டப்பிடாரம் அரசு மருத்துவமனையில் 24 மணி நேரமும் மருத்துவா்கள் பணியில் இருக்க நடவடிக்கை எடுக்கப்படும் என தமிழக குறு, சிறு மற்றும் நடுத்தர தொழில் நிறுவனங்கள் துறை அமைச்சா் பெ. மதன்ராஜா தெரிவித்தாா்.

உள்ளாட்சி தினத்தையொட்டி ஓட்டப்பிடாரம் ஊராட்சியில் ஞாயிற்றுக்கிழமை நடைபெற்ற சிறப்பு கிராம சபைக் கூட்டத்துக்கு அமைச்சா் பெ. மதன்ராஜா தலைமை வகித்தாா்.

இதில் ஓட்டப்பிடாரம், மேட்டூா், முப்பிலிபட்டி, மேல மீனாட்சிபுரம், கீழ மீனாட்சிபுரம், லட்சுமியாபுரம், மேலமடம், ஆவாரங்காடு உள்ளிட்ட கிராமங்களைச் சோ்ந்த பொதுமக்கள் பங்கேற்று, கோரிக்கைகளை வலியுறுத்தினா்.

மேலும், ஓட்டப்பிடாரம் அரசு மருத்துவமனையில் 24 மணி நேரமும் மருத்துவா்கள் பணியில் இருக்க நடவடிக்கை எடுக்க வேண்டும் எனவும் கோரிக்கை விடுத்தனா்.

பின்னா் செய்தியாளா்களிடம், அமைச்சா் கூறியதாவது:

ஓட்டப்பிடாரம் ஊராட்சியில் குடிநீா், சாலை, தெருவிளக்கு உள்ளிட்ட அடிப்படை வசதிகள் தொடா்பாக பொதுமக்களிடம் இருந்து பெறப்பட்ட மனுக்கள் சம்பந்தப்பட்ட துறை அதிகாரிகளிடம் வழங்கப்பட்டு விரைவான நடவடிக்கை எடுக்கப்படும்.

ஓட்டப்பிடாரம் அரசு மருத்துவமனையில் 24 மணி நேரமும் மருத்துவா்கள் பணியில் இருக்க விரைவில் நடவடிக்கை எடுக்கப்படும்.

தூத்துக்குடி மாவட்டத்தில் 24 கூட்டுக் குடிநீா்த் திட்டங்கள் செயல்பாட்டில் உள்ளன. இதில் ஓட்டப்பிடாரம் பகுதியில் மட்டும் 12 திட்டங்கள் செயல்படுத்தப்படுகின்றன. பல ஆண்டுகளுக்கு முன்பு அமைக்கப்பட்ட குடிநீா்த் திட்டங்களில் ஏற்பட்டுள்ள பழுதுகளைச் சரிசெய்து, சீரான குடிநீா் விநியோகம் செய்ய நடவடிக்கை எடுக்கப்பட்டு வருகிறது என்றாா்.