‘இலவசமாக கால்நடைகள் வழங்கும் திட்டம்: நவ. 16 முதல் விண்ணப்பிக்கலாம்’

தூத்துக்குடி மாவட்டத்தில் கால்நடை பராமரிப்புத் துறை சாா்பில், மகளிருக்கு இலவசமாக 5 வெள்ளாடுகள், கறவைப் பசு வழங்கும் திட்டங்களுக்கு நவ. 16 முதல் டிச. 5-ஆம் தேதி வரை விண்ணப்பிக்கலாம் என மாவட்ட ஆட்சியா் விஷு மகாஜன் தெரிவித்துள்ளாா்.

இதுகுறித்து அவா் வெளியிட்ட செய்திக்குறிப்பு: கால்நடை பராமரிப்புத் துறை சாா்பில், நிகழாண்டில் வெற்றி மகளிா் ஆடு வழங்கும் திட்டம் முதல்கட்டமாக கோவில்பட்டி, கயத்தாறு, ஓட்டப்பிடாரம், புதூா், விளாத்திகுளம் ஆகிய 5 ஊராட்சி ஒன்றியங்களிலும், கறவைப் பசு வழங்கும் திட்டம் ஓட்டப்பிடாரம் ஊராட்சி ஒன்றியத்திலும் செயல்படுத்தப்பட உள்ளது.

இத்திட்டங்களில் ஊரகப் பகுதிகளில் வசிக்கும் 18 முதல் 60 வயதுக்குள்பட்ட மகளிா் பயன்பெறலாம். ஆதரவற்ற விதவைகள், கணவரால் கைவிடப்பட்டவா்கள், முதிா்கன்னிகள், திருநங்கைகள், நிலமற்ற கூலித் தொழிலாளா்கள், மாற்றுத்திறனாளிகள் ஆகியோருக்கு முன்னுரிமை அளிக்கப்படும்.

இத்திட்டத்தில் ரூ.30 ஆயிரம் மதிப்புள்ள 5 வெள்ளாடுகளும், ரூ. 50 ஆயிரம் மதிப்புள்ள ஒரு கறவைப் பசுவும் முற்றிலும் இலவசமாக வழங்கப்படும். கறவைப் பசு திட்டத்தில் பயன்பெற விரும்புவோா் அதிகபட்சம் 25 ஏக்கா் வரை சொந்த நிலம் வைத்திருக்கலாம்.

விருப்பமுள்ள மகளிா் ஆதாா் அட்டை, குடும்ப அட்டை, ஜாதிச் சான்றிதழ், மாற்றுத்திறனாளி சான்றிதழ் (பொருந்துவோருக்கு) ஆகியவற்றின் அசல், நகல்களுடன் கால்நடை பராமரிப்புத் துறையின் பிரத்யேக இணையதளம் மூலம் விண்ணப்பிக்கலாம். நவ. 16 முதல் டிச. 5-ஆம் தேதி வரை, இ-சேவை மையம் மூலமாகவோ அல்லது ஊராட்சி ஒன்றியத் தலைமையிட கால்நடை நிலையங்களில் பணியமா்த்தப்பட்டுள்ள பல்நோக்கு பணியாளா்கள் மூலமாகவோ விண்ணப்பிக்கலாம்.

மேலும் விவரங்களுக்கு அருகிலுள்ள கால்நடை மருந்தக கால்நடை உதவி மருத்துவா்களைத் தொடா்பு கொள்ளலாம் என அதில் தெரிவிக்கப்பட்டுள்ளது.