ஆடிக்கிருத்திகை: முருகன் கோயில்களில் சிறப்பு வழிபாடு

ஆடிக்கிருத்திகையை முன்னிட்டு கரூர் மாவட்ட முருகன் கோயில்களில் ஞாயிற்றுக்கிழமை  பக்தர்கள் காவடி, பால்குடம் எடுத்து வந்து சிறப்பு வழிபாடு செய்தனர். 
ஆடிக்கிருத்திகை முருகப்பெருமானுக்கு மிகவும் உகந்த கிருத்திகையாகும். ஞாயிற்றுக்கிழமை ஆடிக்கிருத்திகையை முன்னிட்டு கரூர் மாவட்டத்தில் உள்ள புகழிமலை, பாலமலை, வெண்ணைமலை ஆகிய மலைகளில் குடிகொண்டிருக்கும் முருகப்பெருமானுக்கு சிறப்பு வழிபாடுகள் நடைபெற்றன. தனம், தீர்த்தம், மூர்த்தி சிறப்புகொண்டதும், அருணகிரிநாதர், ஒளவையார் ஆகியோரால் பாடப்பெற்ற ஸ்தலமாக விளங்கும் வெண்ணைமலை முருகன் கோயிலில் அதிகாலையிலே முருகப்பெருமானுக்கும், வள்ளி, தெய்வானைக்கும் சிறப்பு வழிபாடுகள் நடைபெற்றன.
வெங்கமேடு பகுதியினர் ஸ்ரீகாமாட்சியம்மன் கோயிலில் இருந்து பால்குடம், சந்தன குடம், இளநீர் காவடி, புஷ்பகாவடி,  தீர்த்தக்காவடிகளை எடுத்து வந்து சுவாமிக்கு சிறப்பு அபிஷேகம் செய்தனர். பின்னர் சுவாமிகளுக்கு தீபாராதனை நடைபெற்றது.
அதிகாலை முதல் பிற்பகல் வரை பக்தர்கள் நீண்டவரிசையில் நின்று சுவாமி தரிசனம் செய்தனர். பின்னர் பக்தர்கள் அனைவருக்கு அன்னதானம் வழங்கப்பட்டது. இதேபோல கரூர் பசுபதீஸ்வரர் கோயில், ஐந்துரோடு கோடீஸ்வரர் கோயில் 
உள்ளிட்ட கோயில்களிலும் சிறப்பு வழிபாடுகள் நடைபெற்றது. திரளான பக்தர்கள் திரளாக பங்கேற்று சுவாமி தரிசனம் செய்தனர்.