தொழிலதிபரிடம் கடன் பெற்று தருவதாகக் கூறி ரூ.1.9 கோடி மோசடி: தம்பதி மீது வழக்கு

தொழிலதிபரிடம் குறைந்த வட்டிக்கு கடன் பெற்றுத் தருவதாகக் கூறி ரூ.1.9 கோடி மோசடி செய்ததாக தம்பதி மீது ஞாயிற்றுக்கிழமை வழக்கு பதியப்பட்டது. 
மதுரை மாவட்டம், மேலூரைச் சேர்ந்த மயில்சாமி நடராஜன் என்பவரிடம் குறைந்த வட்டிக்கு வெளியாட்களிடம் கடன் பெற்றுத் தருவதாக புதுக்கோட்டை மாவட்டம், இலுப்பூரைச் சேர்ந்த கே.செந்தில்வேல்(44), அவரது மனைவி வெள்ளையம்மாள் ஆகியோர் கூறியுள்ளனர். 
இதனை நம்பிய மயில்சாமி நடராஜன் ரூ.1.9 கோடியை செந்தில்வேல், அவரது மனைவி வெள்ளையம்மாளிடம் கொடுத்துள்ளார். பணத்தை பெற்றுக் கொண்ட இருவரும் தெரிவித்தபடி கடன் பெற்றுத் தராததோடு, வாங்கிய பணத்தையும் திருப்பிக் கொடுக்காமல் ஏமாற்றி வந்துள்ளனர்.
இதுகுறித்து மாவட்டக் குற்றப்பிரிவு போலீஸில் மயில்சாமி நடராஜன் புகார் அளித்தார். அதன்பேரில், செந்தில்வேலன், வெள்ளையம்மாள் ஆகியோர் மீது வழக்குப் பதிவு செய்யப்பட்டது.ஏற்கெனவே, திருச்சியைச் சேர்ந்த இரும்பு வியாபாரியிடம் கடன் பெற்றுத் தருவதாகக் கூறி ரூ.30 லட்சம் மோசடி செய்த புகாரில் கடந்த வாரம் செந்தில்வேல் கைது செய்யப்பட்டு சிறையில் அடைக்கப்பட்டுள்ளார். தலைமறைவாக உள்ள வெள்ளையம்மாள் தேடப்பட்டு வருகிறார்.