கணவருடன் சேர்த்து வைக்கக் கோரி செல்லிடப்பேசி கோபுரத்தில் ஏறிஇளம்பெண் தற்கொலை மிரட்டல்

புதுக்கோட்டை மாவட்டம் கீரனூர் அருகே கணவருடன் சேர்த்து வைக்கக் கோரி இளம்பெண் செல்லிடப்பேசி கோபுரத்தில் ஏறி திங்கள்கிழமை தற்கொலை மிரட்டல் விடுத்தார்.
புதுக்கோட்டை மாவட்டம் பாசிப்பட்டியைச் சேர்ந்தவர் மணிகண்டன்(28). பொறியாளர். குளத்தூரைச் சேர்ந்த லட்சுமணன் மகள் வினோதினி(21). செவிலியர். இவர்கள் இருவரும் கடந்த 4 மாதங்களுக்கு முன்பு காதல் திருமணம் செய்துகொண்டனர். இவர்களது திருமணத்துக்கு மணிகண்டன் குடும்பத்தினர் எதிர்ப்பு தெரிவித்து, அவரை பெற்றோர் அழைத்து சென்றதாகவும் கூறப்படுகிறது.
இதையடுத்து தனது பெற்றோர் வீட்டில் வினோதினி இருந்துள்ளார். இந்நிலையில்,  தன்னை  கணவரோடு சேர்த்து வைக்குமாறு கீரனூர் அனைத்து மகளிர் காவல் நிலையத்தில் அண்மையில் புகார் மனு அளித்துள்ளார். 
இதுதொடர்பாக எவ்வித முன்னேற்றமும் ஏற்படவில்லையாம். 
இதனால் விரக்தி அடைந்த வினோதினி, கீரனூர் பேருந்து நிலையம் அருகே உள்ள செல்லிடப்பேசி கோபுரத்தில் ஏறி தன்னை மணிகண்டனோடு சேர்த்து வைக்க வேண்டும், இல்லையெனில் குதித்து தற்கொலை செய்யப்போவதாக  மிரட்டல் விடுத்தார். 
இதையடுத்து அங்கு சென்ற கீரனூர் போலீஸார், தீயணைப்பு நிலையத்தினர் செல்லிடப்பேசி கோபுரத்தில் ஏறி  2 மணி நேரத்துக்குப் பிறகு வினோதினியை மீட்டனர்.