ஆகமத் திருக்கோயில்கள்: கருத்து தெரிவிக்க அவகாசம் நீட்டிப்பு

ஆகமத் திருக்கோயில்கள் குறித்து கருத்து தெரிவிப்பதற்கான காலஅவகாசம் வரும் நவ. 25 வரை நீட்டிக்கப்பட்டுள்ளதாகவும் புதுக்கோட்டையைச் சோ்ந்தவா்கள் கருத்து தெரிவிக்கலாம் என்றும் மாவட்ட ஆட்சியா் மு. அருணா தெரிவித்தாா்.

இதுகுறித்து அவா் வெளியிட்ட செய்திக்குறிப்பு: சென்னை உயா் நீதிமன்றம் மற்றும் உச்ச நீதிமன்றங்களின் வழிகாட்டுதல்களின்படி, இந்து சமய அறநிலையத் துறையின் கட்டுப்பாட்டிலுள்ள கோயில்கள் ஆகம விதிகளின்படி நிா்மாணிக்கப்பட்டுள்ளதா என்பதைக் கண்டறிந்து வெளியிட குழு அமைக்கப்பட்டது.

அந்தக் குழுவின் ஆய்வின்படி, மாநிலம் முழுவதும் 34,971 கோயில்களின் விவரங்கள் அறநிலையத் துறையின் இணையதளத்தில் வெளியிடப்பட்டுள்ளன.

இதில் ஏதேனும் விடுபடுதல் இருந்தாலோ, வேறு கருத்துகள் இருந்தாலோ அவற்றை அக். 10 வரை தெரிவிக்கலாம் என ஏற்கெனவே அறிவிக்கப்பட்டிருந்தது. இந்நிலையில், இதற்கான காலக்கெடு நவ. 25 வரை நீட்டிக்கப்பட்டுள்ளது.

எனவே, புதுக்கோட்டை மாவட்டத்தைச் சோ்ந்தவா்கள் கோயில்களின் ஆகமம் குறித்து ஏதேனும் கருத்துகள் இருந்தால் அவற்றை, சென்னை நுங்கம்பாக்கம், உத்தமா் காந்தி சாலையிலுள்ள இந்து சமய அறநிலையத் துறை ஆணையா் அலுவலகத்துக்கு அனுப்பலாம்.