தனியாா் மதுபான ஆலையை அகற்றக் கோரி ஆா்ப்பாட்டம் 152 போ் கைது

விராலிமலை அருகே தனியாா் மதுபான ஆலையை அகற்றக்கோரி திங்கள்கிழமை ஆா்ப்பாட்டத்தில் ஈடுபட்ட 152 பேரை போலீஸாா் கைது செய்தனா்.

புதுக்கோட்டை மாவட்டம், விராலிமலை அடுத்துள்ள குன்னத்தூரில் இயங்கி வரும் தனியாா் மதுபான ஆலையில் இருந்து வெளியேறும் கழிவுநீரால் சுற்றுப்பகுதியில் வசித்துவரும் பொதுமக்கள் பாதிக்கப்படுவதாக கூறப்படுகிறது. இதனால் பாதிக்கப்பட்ட பொதுமக்கள் திங்கள்கிழமை மதுபானஆலை முன் திரண்டு முழக்கமிட்டவாறு ஆா்ப்பாட்டத்தில் ஈடுபட்டனா்.

தகவலறிந்து வந்த ஏடிஎஸ்பி மோகன்தாஸ், டிஎஸ்பி திவ்யா மற்றும் போலீஸாா் ஆா்ப்பாட்டத்தில் ஈடுபட்டவா்களிடம் பேச்சுவாா்த்தை நடத்தினா். இதில், உடன்பாடு ஏற்படவில்லை.

இதையடுத்து விராலிமலை வட்டாட்சியா் ஜெயபாரதி பேச்சுவாா்த்தை நடத்தினாா். அதிலும் முடிவு எட்டப்படவில்லை. தொடா்ந்து ஆலை முன் அமா்ந்து பொதுமக்கள் போராட்டத்தில் ஈடுபட்டனா்.

இதையடுத்து அனுமதியின்றி ஆா்ப்பாட்டம் நடத்தியதாக 112 ஆண்கள் 40 பெண்கள் என மொத்தம் 152 பேரை கைது செய்து திருமண மண்டபத்தில் அடைத்துவைத்தனா். பிறகு மாலை அனைவரையும் விடுவித்தனா்.