தமிழ்ப் பல்கலை.யில் ஆசிரியர் தின விழா

தஞ்சாவூர் தமிழ்ப் பல்கலைக்கழகத்தில் ஆசிரியர் தின விழா புதன்கிழமை நடைபெற்றது.
இதில்,  பல்கலைக்கழகத் துணைவேந்தர் பொறுப்புக் குழு உறுப்பினர் செ. சுப்பிரமணியன் கேக் வெட்டி பேசியது:
குடியரசு முன்னாள் தலைவர் ராதாகிருஷ்ணன் அடிப்படையில் கல்லூரி ஆசிரியராக இருந்து,  பல்கலைக்கழகத் துணைவேந்தராகவும் செயலாற்றியவர். ஆசிரியர் பணியே அறப்பணி என்பதற்கு முன் மாதிரியாக அவர் விளங்கியதால், அவரது மாணவர்களே அவரது பிறந்த நாளை ஆசிரியர் தினமாகக் கொண்டாடத் தொடங்கினர். 
அதுவே பிற்காலத்தில் ஆசிரியர் தினமாக மாறி கொண்டாடப்பட்டு வருகிறது. அவருடைய கொள்கைகள், தத்துவங்கள் என்றும் இளைய சமுதாயத்துக்குப் பயன் அளிக்கும்.
போற்றுதலுக்குரிய அவருடைய உழைப்பையும், நல்ல குணங்களையும் மாணவர்கள் பின்பற்ற வேண்டும். 
இதன்மூலம் எதிர்கால இந்தியா வலிமையும் வளமும் பெறும் என்றார் சுப்பிரமணியன்.மேலும், சுப்பிரமணியன், பேராசிரியர் கமலதியாகராஜனுக்கு நூற்றுக்கும் அதிகமான மாணவ, மாணவிகள் பொன்னாடை அனிவித்து மரியாதை செலுத்தினர். நிகழ்ச்சியில் பேராசிரியர்கள் உள்ளிட்டோர் கலந்து கொண்டனர்.