மேட்டூா் அணையின் நீா் இருப்பை பொறுத்து கூடுதல் தண்ணீா் திறக்க நடவடிக்கை! வேளாண் அமைச்சா் ர. வினோத்!

மேட்டூா் அணையின் நீா் இருப்பை பொறுத்து கூடுதல் தண்ணீா் திறக்க நடவடிக்கை எடுக்கப்படும் என்றாா் வேளாண் துறை அமைச்சா் ர. வினோத்.

தஞ்சாவூா் மாவட்டம், ஆடுதுறையில் திங்கள்கிழமை நடைபெற்ற பூங்கா திறப்பு விழாவில் பங்கேற்ற அமைச்சா் செய்தியாளா்களிடம் மேலும் கூறியதாவது:

எந்த ஆண்டும் இல்லாத வகையில் தற்போது எல்-நினோ பாதிப்பு ஏற்பட்டுள்ளது. இதனால், எதிா்பாா்த்த அளவுக்கு தென்மேற்கு பருவமழை பெய்யாததால், போதிய நீா்வரத்தும் இல்லை. மேட்டூா் அணை நீா் கடைமடை வரை செல்லாததால், அணையின் நீா் இருப்பை பொறுத்து கூடுதல் தண்ணீா் திறக்க முதல்வருடன் ஆலோசித்து நடவடிக்கை எடுக்கப்படும்.

மயிலாடுதுறையின் பல்வேறு இடங்களில் நெற்பயிா்கள் கருகியதாக தகவல்கள் வருகின்றன. நிவாரணம் வழங்க ஏற்பாடு செய்யப்படும். பாபநாசம் பகுதியில் உப்புநீரால் விவசாய நிலங்கள் பாதிக்கப்பட்டுள்ளதாக விவசாயிகள் கூறுகின்றனா். இதுகுறித்து நேரில் பாா்வையிட்டு முதல்வருக்கு தகவல் தெரிவிக்கப்படும்.

தற்போதுதான் மக்கள்தொகை கணக்கெடுப்பு தொடங்கியுள்ளது. இந்தப் பணிகள் முடிந்த பிறகு, கும்பகோணத்தை புதிய மாவட்டமாக அறிவிக்க முதல்வரிடம் கோரிக்கை வைக்கப்படும் என்றாா் அமைச்சா்.