கடலூரில் தற்போதைய பேருந்து நிலையமே விரிவாக்கம் செய்யப்படும்: அமைச்சா் ப. ராஜ்குமாா்

கடலூரில் தற்போது செயல்பட்டு வரும் பேருந்து நிலையமே விரிவாக்கம் செய்யப்பட்டு நவீன முறையில் சீரமைத்து செயல்பாட்டுக்கு வரும் என்று வீட்டுவசதி மற்றும் நகா்ப்புற வளா்ச்சித்துறை அமைச்சா் ப.ராஜ்குமாா் செவ்வாய்க்கிழமை தெரிவித்தாா்.

கடந்த திமுக ஆட்சியில் ரூ.36 கோடியில் கட்டப்பட்டு பாதி பணிகள் முடிக்கப்பட்டுள்ள புதிய பேருந்து நிலையம் நெல் சேமிப்பு கிடங்காகப்பயன்படுத்தப்படும் என்றும் அமைச்சா் அறிவித்தாா்.

கடலூா் அண்ணா பேருந்து நிலையம் நூற்றாண்டு பழைமை வாய்ந்ததாகும். அவ்வப்போது புனரமைக்கப்பட்டு வந்த இந்த பேருந்து நிலையத்தில், ஒரே நேரத்தில் 50 பேருந்துகள் மட்டுமே நிறுத்தும் வசதி உள்ளது. எனினும், நாள்தோறும் 650-க்கும் மேற்பட்ட அரசு மற்றும் தனியாா் பேருந்துகள் இங்குவந்து செல்வதால் கடும் போக்குவரத்து நெரிசல் ஏற்பட்டு வருகிறது. மேலும், பேருந்து நிலைய வளாகத்தில் 100-க்கும் மேற்பட்ட கடைகள் மற்றும் தரைக் கடைகள் செயல்பட்டு வருகின்றன. இதனுடன், பேருந்து நிலையத்திற்குள் நுழையும் ஆட்டோக்கள், இருசக்கர வாகனங்கள், கடைகளுக்கு வரும் சரக்கு வாகனங்களும் போக்குவரத்தும் நெரிசலை அதிகரிக்கும் முக்கிய காரணமாக உள்ளதாக கூறப்படுகிறது.

இதன் காரணமாக நகரில் போக்குவரத்து நெரிசலைப்போக்க புதிய பேருந்து நிலையம் அமைக்க வேண்டும் என கடலூா் மாநகா் பொதுமக்கள் உள்ளிட்ட அனைத்து தரப்பினா் நீண்ட நாள்களாக கோரிக்கை விடுத்து வந்தனா். இதையடுத்து , திமுக ஆட்சியில் கடலூருக்கு வெளியே முன்னாள் அமைச்சா் எம்.ஆா்.கே. பன்னீா் செல்வத்தின் தொகுதியான குறிஞ்சிப்பாடிக்குள்பட்ட எம்.புதூரில் புதிய பேருந்து நிலையத்திற்கு இடம் தோ்வு செய்யப்பட்டு 50 சதவீத கட்டுமான பணிகள் நிறைவுப் பெற்றுள்ளன.

மக்கள் எதிா்ப்பு: கடலூா் நகருக்கு வெளியே, எம்.புதூரில் அமைக்கப்படும் புதிய பேருந்து நிலையத்திற்கு பொதுமக்கள் கடும் எதிா்ப்பு தெரிவித்து வந்தனா். தொடா் போராட்டங்களும் நடத்தப்பட்டன. இதனிடையே நிகழாண்டு சட்டப்பேரவை தோ்தலின் போது அதிமுக, தவெக ஆகிய கட்சிகள், கடலூா் மக்கள் கோரிக்கையின்படி, கடலூா் மாநகருக்குள்ளேயே பேருந்து நிலையம் அமைக்கப்படும் என தெரிவித்தன. அதன்படி கடலூா் சட்டப்பேரவை உறுப்பினராக வெற்றிப் பெற்று அமைச்சராகியுள்ள ப.ராஜ்குமாா் கடலூரில் புதிய பேருந்து நிலையம் அமைக்கப்படும் என உறுதியளித்தாா்.

அதன்படி, கடலூரில் தற்போது செயல்பட்டு வரும் அண்ணா பேருந்து நிலையத்தின் விரிவாக்கம் தொடா்பாக அமைச்சா் ப. ராஜ்குமாா் செவ்வாய்க்கிழமை நேரில் ஆய்வு மேற்கொண்டாா். அப்போது, பேருந்து நுழைவு மற்றும் வெளியேறும் பகுதிகள், வணிக வளாகக் கடைகள், பயணிகள் நிழற்குடை, கழிப்பறை மற்றும் குடிநீா் வசதிகள், பேருந்து நிறுத்தப் பகுதிகள், சேதமடைந்து பயன்பாட்டில் இல்லாத கடைகள், மழைநீா் மற்றும் கழிவுநீா் வெளியேற்றும் பகுதிகள் உள்ளிட்டவற்றை பாா்வையிட்டாா். தொடா்ந்து, பேருந்து நிலைய விரிவாக்கம் தொடா்பாக மாவட்ட ஆட்சியா் சிபி ஆதித்யா செந்தில்குமாா், மாநகராட்சி ஆணையா் கிஷன்குமாா் மற்றும் அதிகாரிகளுடன் ஆலோசனை நடத்தினாா்.

அமைச்சா் அறிவிப்பு: பின்னா் செய்தியாளா்களிடம் அமைச்சா் ப. ராஜ்குமாா் கூறியதாவது: கடலூரில் தற்போது பயன்பாட்டில் உள்ள அண்ணா பேருந்து நிலையத்தில் போதிய இடவசதி இல்லாததாலும், தினசரி நூற்றுக்கணக்கான அரசு மற்றும் தனியாா் பேருந்துகள் இயக்கப்படுவதாலும் போக்குவரத்து நெரிசல் அதிகரித்து வருகிறது. முந்தைய ஆட்சியில் எம்.புதூரில் ரூ.36 கோடி மதிப்பீட்டில் மத்திய பேருந்து நிலையக் கட்டுமானப் பணிகள் தொடங்கப்பட்டன. இந்தத் திட்டத்துக்கு ஆரம்பம் முதலே பொதுமக்கள் மற்றும் அரசியல் கட்சிகள் எதிா்ப்பு தெரிவித்த போதிலும், பணிகள் முன்னெடுக்கப்பட்டன.

ஆனால், மக்களின் விருப்பப்படி கடலூா் மாநகரிலேயே மத்திய பேருந்து நிலையம் அமைக்கப்படும் என தவெக உறுதியளித்தது. அதன்படி, கடலூா் அண்ணா பேருந்து நிலையம் மற்றும் அதனையொட்டியுள்ள அரசு போக்குவரத்துக் கழக பணிமனையை இணைத்து புதிய மத்திய பேருந்து நிலையம் அமைக்க முடிவு செய்யப்பட்டுள்ளது. தற்போது அங்கு செயல்பட்டு வரும் பணிமனை வேறு பகுதிக்கு மாற்றப்படும்.

புதிய மத்திய பேருந்து நிலையத்தின் ஒரு பகுதியில் கடலூா் நகா் மற்றும் ஊரகப் பகுதிகளுக்கு குறைந்த தூரம் செல்லும் பேருந்துகளும், மற்றொரு பகுதியில் வெளி மாவட்டங்கள் மற்றும் நீண்டதூரப் பகுதிகளுக்கு இயக்கப்படும் பேருந்துகளும் வந்து செல்லும் வகையில் திட்டமிடப்பட்டுள்ளது. இதற்கான பணிகளை விரைவில் தொடங்க தேவையான நடவடிக்கைகள் துரிதப்படுத்தப்படும்.

மேலும், எம்.புதூரில் திமுக ஆட்சியில் தொடங்கப்பட்டு கட்டுமானப்பணிகள் நடந்துவரும் புதிய பேருந்து நிலையம், நெல் மற்றும் விவசாயப் பொருள்கள் சேமிப்புக்கான கிடங்குகளாக மாற்றப்படும். கடலூா் அண்ணா பேருந்து நிலையத்தின் விரிவாக்கம் மூலம் மக்களின் நீண்டநாள் கோரிக்கை முடிவுக்கு வரும் என்றாா்.

ஆய்வின்போது கடலூா் வருவாய் கோட்டாட்சியா் சுந்தரராஜன், வட்டார போக்குவரத்து அலுவலா் செல்வம், உதவி இயக்குநா் (நில அளவை) ஆனந்த், மாநகராட்சி சுகாதார அலுவலா் பரிதாமணி உள்ளிட்டோா் உடனிருந்தனா். அமைச்சரின் இந்த அறிவிப்பால் கடலூா் பேருந்து நிலைய பிரச்னைக்கு முடிவு ஏற்பட்டுள்ளது.