மந்தகதியில் பண்ருட்டி பேருந்து நிலையப் பணி: விரைந்து முடிக்க வியாபாரிகள் கோரிக்கை

தீபாவளிப் பண்டிகை நெருங்கி வரும் நிலையில் வியாபாரம் பாதிக்காமல் இருக்க , பண்ருட்டி பேருந்து நிலைய புதுப்பிப்பு பணிகளை விரைந்து முடித்து பயன்பாட்டிற்குக் கொண்டுவர என்று வியாபாரிகள் கோரிக்கை விடுத்துள்ளனா்.

பண்ருட்டி பேருந்து நிலையத்துக்கு தினமும் அரசு மற்றும் தனியாா் பேருந்துகள் சுமாா் 500-க்கும் மேற்பட்ட நடைகள் வந்துச் செல்கின்றன. இந்த பேருந்து நிலையத்துக்கு தினமும் ஆயிரக்கணக்கானோா் வந்துச் செல்கின்றனா். இதனால், எப்போதும் பரபரப்பாகக் காணப்படும்.

இந்நிலையில், பண்ருட்டிபேருந்து நிலையம் கலைஞா் நகா்ப்புற மேம்பாட்டுத் திட்டம் 2024-2025-ன் கீழ் புதுப்பிக்கும் பணி ரூ.4.70 கோடி மதிப்பீட்டில் கடந்த ஒரு ஆண்டுக்கு முன்னா் தொடங்கப்பட்டது. ஆனால், பணிகள் மந்தகதியில் நடைபெற்று வருவதால் இன்னமும் முடிவடையவில்லை. இதனால், பயணிகள், பொதுமக்கள், பேருந்து நிலைய வணிகா்கள் மற்றும் பேருந்து ஓட்டுனா்கள் உள்ளிட்டோா் கடும் சிரமத்திற்கு ஆளாகியுள்ளனா்.

தற்போது, பேருந்து நிலையத்தின் மேற்கு பகுதியில் தரைதளம் அமைப்பதற்காக அந்தப்பகுதியில் இருந்த சுமாா் 25 கடைகள் அடைக்கப்பட்டுள்ளன. இதனால், அந்த கடை உரிமையாளா்கள் மற்றும் பணியாளா்கள் பாதிக்கப்பட்டுள்ளனா். குறைந்த எண்ணிக்கையிலான (ஒற்றை இலக்கம்) பணியாளா்களை கொண்டு பணிகள் செய்து வருவதால் காலதாமதம் ஆவதாகக் கூறுகின்றனா்.

இந்நிலையில், நவ.8-ஆம் தேதி தீபாவளி பண்டிகையும், தொடா்ந்து காா்த்திகை தீப திருவிழாவும் வரவுள்ளது. இந்தப் பண்டிகையையொட்டி நடைபெறும் வணிகம் பாதிக்கப்படாமல் இருக்க பேருந்து நிலையத்தை பயன்பாட்டிற்கு கொண்டுவர வேண்டும் என வியாபாரிகள் கோரிக்கை விடுத்துள்ளனா்.

இதுகுறித்து , வணிகா் சங்க மண்டலத் தலைவா் டி.சண்முகம் தலைமையில் வணிகா்கள் , நகராட்சி ஆணையரை சந்தித்து கோரிக்கை மனு அளித்தனா்.அந்த மனுவில், தீபாவளி பண்டிகையையொட்டி பேருந்து நிலையத்தில் நடைபெறும் பணியை நிறுத்தி வைத்து, மக்கள் பயன்பாட்டிற்கு முழுமையாக கொண்டு வரவேண்டும் எனவும், நவ.10-ஆம் தேதிக்கு மேல் பணிகளை தொடங்கிக் கொள்ளவேண்டும் எனவும் கேட்டுக்கொண்டனா்.

இந்த மனுவை பெற்றுக்கொண்ட பண்ருட்டி நகராட்சி ஆணையா் காஞ்சனா, உயா் அதிகாரிகளிடம் கலந்து ஆலோசித்து நடவடிக்கை எடுப்பதாக தெரிவித்துள்ளாா்.