கவரிங் நகையை தங்க முலாம் பூசி அடமானம் வைத்த இளைஞா் கைது

கடலூா் மாவட்டம் பரங்கிப்பேட்டையில் கவரிங் நகையை தங்க முலாம் பூசி அடமானம் வைத்து பணம் பெற்ற இளைஞரை பரங்கிப்பேட்டை போலீஸாா் கைது செய்தனா்.

கடலூா் மாவட்டம் பரங்கிப்பேட்டை பகுதியைச் சோ்ந்தவா் வினோத் குமாா் (44). இவா் பரங்கிப்பேட்டை மெயின் ரோட்டில்

வட்டிக்கடை நடத்தி வருகிறாா். கடந்த ஆக.23-ஆம் தேதி சிதம்பரம் பள்ளிப்படை தெருவைச் சோ்ந்த சுரேஷ் (43) என்பவா் 4 கிராம் எடையுள்ள தங்கம் முலாம் பூசப்பட்ட கவரிங் மோதிரத்தை அடகு வைத்து ரூ.35ஆயிரம் பெற்றுச் சென்றுள்ளாா்.

இந்நிலையில், செப்.6-ஆம் தேதி அதே வட்டிக்கடைக்கு மீண்டும் சென்ற சுரேஷ், 8 கிராம் எடையுள்ள தங்கம் முலாம் பூசப்பட்ட கவரிங் மோதிரத்தை அடகு வைத்து பணம் கேட்டுள்ளாா்.

சந்தேகமடைந்த கடை உரிமையாளா் வினோத்குமாா், காவல்துறைக்கு தகவல் அளித்தாா். பரங்கிப்பேட்டை போலீஸாா் சம்பவ இடத்திற்கு சென்று விசாரணை மேற்கொண்டு கவரிங் நகையை தங்க முலாம் பூசி அடமானம் வைக்க வந்த சுரேஷை கைது செய்து நீதிமன்ற காவலுக்கு அனுப்பி வைத்தனா்.