புதுச்சேரி குடிநீா் தேவைக்கு தினசரி 3 கோடி லிட்டா் என்எல்சி நீா்! - துணைநிலை ஆளுநா் கே.கைலாஷ்நாதன்

புதுச்சேரியின் குடிநீா் தேவைக்கு இலவசமாக நாளொன்றுக்கு 3 கோடி லிட்டா் தண்ணீா் வழங்க நெய்வேலி நிலக்கரி நிறுவனம் (என்எல்சி) முன்வந்துள்ளது என துணைநிலை ஆளுநா் கே.கைலாஷ்நாதன் தெரிவித்தாா்.

மக்கள் நலத் திட்ட பிரசாரத்தின் ஒரு பகுதியாக புதுச்சேரி பொதுப் பணித் துறை சாா்பில் துய்மாஸ் வீதியில் உள்ள பாசியோனா பிரெஞ்சு மகளிா் உயா்நிலைப்பள்ளியில் இருந்து பேட்டரி பேருந்தில் பிரகதி யாத்திரையைத் தொடங்கி வைத்து அவா் பேசியது:

புதுச்சேரியைப் பொருத்தவரை இப்போதுள்ள விமான நிலையத்தின் ஓடுதளம் 1,500 மீட்டா் நீளம்தான் இருக்கிறது. இதனால் 72 இருக்கைகள் உள்ள சிறிய விமானங்களைத்தான் இயக்க முடியும். இதை 2,500 மீட்டா் ஓடுதளமாக மாற்ற வேண்டும். இதற்காக நில ஆா்ஜிதம் செய்ய ரூ.1,500 கோடி தேவை. மேலும் பாதி நிலம் புதுச்சேரியிலும், மீதி தமிழகப் பகுதியிலும் இருக்கிறது.

இதைச் செய்து முடித்துவிட்டால் நாட்டின் பல்வேறு பகுதிகளில் இருந்து நேரடியாக பெரிய விமானங்களை இயக்க முடியும். இதனால் 200 இருக்கைகள் உடைய விமானங்கள் இங்கு வந்து செல்ல முடியும். மேலும், நிலத்தை ஒப்படைத்துவிட்டால் புதிய விமான நிலையம் ரூ.3 ஆயிரம் கோடியில் இங்கு வரும்.

இதைத் தவிர கிழக்குக் கடற்கரை சாலை மற்றும் ஜிஎஸ்டி சாலைகள் ரூ.23 ஆயிரம் கோடியில் விரிவாக்கம் செய்யும் பணி இன்னும் 3 ஆண்டுகளில் முடியும். இதில் இப்போது ரூ.11 ஆயிரம் கோடிக்கான பணிகள் நடைபெற்று வருகிறது. இதனால் புதுச்சேரியில் இருந்து பெங்களூருக்கு 3 மணி நேரத்தில் செல்ல முடியும். சென்னைக்கு ஒன்றரை மணி நேரத்தில் பயணிக்க முடியும்.

புதுச்சேரியில் ரயில் நிறுத்தும் வசதி இல்லை. இப்போது புதுச்சேரி ரயில் நிலைய விரிவாக்கப் பணி நடந்து வருகிறது. விழுப்புரத்தில் நிறுத்திதான் ரயிலை இங்கு இயக்க முடிகிறது. வில்லியனூா் அருகே ரயில்வே நிா்வாகம் நிலம் வைத்திருக்கிறது. அங்கிருந்து ரயில்களை இயக்கவும் நடவடிக்கை எடுக்கப்பட்டு வருகிறது. இதற்கு ரூ.2 ஆயிரம் கோடி தேவைப்படுகிறது.

பிரெஞ்சு அரசு புதுச்சேரிக்கு ரூ.500 கோடி அளித்துள்ளது. நெய்வேலிக்கு வெள்ளிக்கிழமை சென்றிருந்தேன். அங்குள்ள அதிகாரிகளுடன் பேசியபோது, சுரங்கங்களில் இருந்து ரட்சத மோட்டாா்கள் மூலம் நெய்வேலியில் இருந்து சென்னைக்கு நீா் செல்கிறது. புதுச்சேரிக்கு ஏன் அந்த நீரை எடுத்து வரக்கூடாது ? அந்த அதிகாரிகள் இலவசமாக புதுச்சேரிக்கு 3 கோடி லிட்டா் நீரை அளிக்கத் தயாா் என்று கூறியுள்ளனா்.

புதுச்சேரிக்குப் பெரிய அளவிலான திட்டங்கள்தான் தேவை. விமானச் சேவை, சாலை வசதி, ரயில் வசதி ஆகிய மூன்று இணைப்புகளும் கிடைத்துவிட்டால் மிகப்பெரிய வளா்ச்சியை எட்ட முடியும் என்றாா் துணைநிலை ஆளுநா் கைலாஷ்நாதன்.

தற்காலிக சட்டப்பேரவைத் தலைவா் ஆ. அன்பழகன், அமைச்சா்கள் ஆ. நமச்சிவாயம், பெ. ராஜவேலு, விக்னேஷ் கண்ணன் எம்எல்ஏ, தலைமைச் செயலா் சரத் சௌகான், அரசு துறைச் செயலா்கள் அ. முத்தம்மா, முகமது யாசின் சௌத்ரி, பொதுப் பணித் துறை தலைமைப் பொறியாளா் கே.வீரசெல்வம் உள்ளிட்டோா் கலந்து கொண்டனா்.