இண்டி கூட்டணி பிரசாரத்துக்கு எதிராக புதுச்சேரியில் பாஜக விழிப்புணா்வு ஊா்வலம்

இண்டி கூட்டணியின் பிரசாரத்துக்கு பதிலடியாக புதுச்சேரி பாஜக சாா்பில் விழிப்புணா்வு ஊா்வலம் செவ்வாய்க்கிழமை நடைபெற்றது.

இண்டி கூட்டணி நடத்திய ஊா்வலத்துக்குப் பதிலடியாக பாஜக சாா்பில் நாடு முழுவதும் ஜனநாயகம் காப்போம் - கும்பல் அராஜகத்தை அகற்றுவோம்‘ என்ற முழக்கத்துடன் விழிப்புணா்வு ஊா்வலம் நடைபெற்று வருகிறது. இதையொட்டி செவ்வாய்க்கிழமை புதுச்சேரி மறைமலையடிகள் சாலையில், சுப்பையா சிலை அருகே தொடங்கிய ஊா்வலத்துக்குக் கட்சியின் தலைவா் வி.பி.ராமலிங்கம் தலைமை வகித்தாா். இந்த ஊா்வலம் மறைமலையடிகள் சாலை வழியாக கம்பன் கலையரங்கம் அருகே நிறைவடைந்தது. மேலும், பிரதமா் நரேந்திர மோடி ஆட்சியின் சாதனைகளை எடுத்துரைத்தும், எதிா்க்கட்சிகள் நாட்டில் அமைதிக்குக் குந்தகம் விளைவிப்பதாக விழிப்புணா்வு ஏற்படுத்தியும் இந்த ஊா்வலம் நடந்தது.

இதில் மத்திய அரசின் நுகா்வோா் விவகாரங்கள், உணவு மற்றும் பொது விநியோகத் துறையின் இணையமைச்சா் நிமுபென் ஜெயந்திபாய் பம்பானியா சிறப்பு விருந்தினராகக் கலந்து கொண்டாா். புதுச்சேரி அமைச்சா்கள் ஆ. நமச்சிவாயம், ஜிஎன்எஸ். ராஜசேகரன், ஜான்குமாா் எம்எல்ஏ, சட்டப்பேரவை முன்னாள் தலைவா் ஆா். செல்வம், முன்னாள் எம்எல்ஏக்கள் கல்யாணசுந்தரம், பாஸ்கரன், தங்க. விக்ரமன் மற்றும் கட்சியின் நிா்வாகிகள், தொண்டா்கள் திரளாகக் கலந்து கொண்டனா்.