முருகன் கோயில்களில் ஆடிக் கிருத்திகை

விழுப்புரம் மாவட்டத்தில் உள்ள முருகன் கோயில்களில் ஞாயிற்றுக்கிழமை ஆடிக்கிருத்திகை விழா கோலாகலமாக நடைபெற்றது.
 செஞ்சி - திருவண்ணாமலை சாலை, ஏரிக் கரையில் அமைந்துள்ள முருகன் கோயிலில் ஆடிக் கிருத்திகை திருவிழா ஞாயிற்றுக்கிழமை நடைபெற்றது.
 விழாவை முன்னிட்டு, ஜூலை 27-ஆம் தேதி கொடியேற்றம் நடைபெற்றது. தொடர்ந்து, சனிக்கிழமை காலை அபிஷேக, ஆராதனைகள், இரவு ஸ்ரீவள்ளி தேவசேனா சமேத ஸ்ரீசுப்பிரமணிய சுவாமி வீதியுலா நடைபெற்றது.
 இதைத் தொடர்ந்து, ஞாயிற்றுக்கிழமை செஞ்சி எம்.ஜி.ஆர். நகரில் அமைந்துள்ள ஸ்ரீமகாமாரியம்மன் கோயிலில் இருந்து 108 பால்குடங்கள் ஊர்வலமாக எடுத்துச் செல்லப்பட்டு அபிஷேகம் செய்யப்பட்டது.
 தொடர்ந்து அக்னி சட்டி ஊர்வலம், சக்திவேல் வீதியுலா, மிளகாய்ப் பொடி அபிஷேகம், செடல் சுற்றுதல், மழுவேந்தல், தீ மிதித்தல் உள்ளிட்ட நேர்த்திக் கடன்களை பக்தர்கள் செலுத்தினர்.
 பகல் 12 மணிக்கு அன்னதானமும், தொடர்ந்து ஸ்ரீவள்ளி தேவசேனா ஸ்ரீசுப்ரமணிய சுவாமி வீதியுலாவும் நடைபெற்றன.
 இதேபோல, விழுப்புரம் நாவலர் நெடுந் தெருவில் அமைந்துள்ள பாலமுருகன் கோயில், அவலூர்பேட்டை சித்தகிரி முருகன் கோயிலில் விழா நடைபெற்றது.