இரு சக்கர வாகனம் - லாரி மோதல்: கல்லூரி மாணவர் சாவு

மயிலம் அருகே இரு சக்கர வாகனம் மீது லாரி மோதியதில் கல்லூரி மாணவர் திங்கள்கிழமை உயிரிழந்தார்.
 திண்டிவனம் அருகே கூட்டேரிப்பட்டு பகுதியைச் சேர்ந்த பரந்தாமன் மகன் விக்னேஷ்(21). மயிலத்தில் உள்ள தனியார் பொறியியல் கல்லூரியில், மெக்கானிக்கல் பிரிவில் 3-ஆம் ஆண்டு படித்து வந்தார். திங்கள்கிழமை பகல் 12 மணி அளவில், கூட்டேரிப்பட்டில் இருந்து மயிலத்துக்கு இரு சக்கர வாகனத்தில் சென்று கொண்டிருந்தார்.
 கொல்லியங்குணம் என்ற பகுதியில் சென்றபோது, எதிரே வந்த டிப்பர் லாரி, இரு சக்கர வாகனம் மீது மோதியது. இதில் விக்னேஷ் நிகழ்விடத்திலேயே உயிரிழந்தார்.
 சடலத்தை மயிலம் போலீஸார் மீட்டு விழுப்புரம் அரசு மருத்துவக் கல்லூரி மருத்துவமனைக்கு அனுப்பி வைத்து, வழக்குப் பதிவு செய்து விசாரிக்கின்றனர்.