பெண்ணிடம் இணையவழியில் ரூ.1.90 லட்சம் மோசடி

விழுப்புரம் மாவட்டம், விக்கிரவாண்டி பகுதியைச் சோ்ந்த பெண்ணிடம் இணையவழியில் ரூ.1.90 லட்சம் மோசடி செய்யப்பட்டது குறித்து மாவட்ட சைபா் கிரைம் போலீஸாா் வழக்குப் பதிந்து விசாரிக்கின்றனா்.

விக்கிரவாண்டி பகுதியைச் சோ்ந்த 42 வயதுடைய பெண் ஒருவா் கவரிங் நகைகள் விற்கும் தொழில் செய்து வருகிறாா். இவா் கடந்த சில நாட்களுக்கு முன்பு தனது கைப்பேசியில் முகநூல் பயன்படுத்திக் கொண்டிருந்தாா். அப்போது கைப்பேசியில் பேசிய அடையாளம் தெரியாத நபா் வெளிநாட்டில் மருத்துவராக வேலை பாா்ப்பதாக தெரிவித்துள்ளாா். தொடா்ந்து இருவரும் நட்பாக பேசி பழகி வந்த நிலையில், அந்த அடையாளம் தெரியாத நபா், பிறந்த நாள் பரிசு அனுப்பி வைத்துள்ளதாக தெரிவித்துள்ளாா்.

இதை உண்மையென நம்பிய அந்தப் பெண்ணிடம், கைப்பேசி வழியாக பேசிய மற்றொரு நபா், புதுதில்லி சா்வதேச விமான நிலையத்தில் இருந்து பேசுவதாகவும், உங்களது பெயரில் வந்துள்ள பரிசுப் பொருளுக்கு சேவைக் கட்டணம், சுங்கவரி ஆகியவற்றை செலுத்திப் பெற்றுக்கொள்ளலாம் எனத் தெரிவித்தாா்.

இதை உண்மையென நம்பிய அந்தப் பெண் தனது வங்கிக் கணக்கிலிருந்த ரூ.1.90 லட்சத்தை 6 தவணைகளாக இணையவழியில் அனுப்பி வைத்துள்ளாா். பணத்தைப் பெற்றுக்கொண்டு பரிசுப் பொருள்களை அனுப்பி வைக்காமலும், வாங்கிய பணத்தைத் திருப்பிக் கொடுக்காமலும் அந்த நபா் ஏமாற்றி வருகிறாராம்.

இதுகுறித்த புகாரின் பேரில் விழுப்புரம் மாவட்ட சைபா் கிரைம் போலீஸாா் வழக்குப் பதிந்து, விசாரிக்கின்றனா்.