பாலிவுட்டில் சாதனை படைத்த கேஜிஎஃப் 2 பட வசூல்

பாலிவுட்டில் ஐந்தே நாள்களில் ரூ. 200 கோடி வசூலித்த படம் என்கிற பெருமையை கேஜிஎஃப் 2 படம் பெற்றுள்ளது.

யாஷ் நடிப்பில் 2018-ல் வெளியான கேஜிஎஃப் என்கிற கன்னடப் படம் இந்திய அளவில் கவனம் பெற்றது. மற்ற மொழிகளிலும் டப் செய்யப்பட்டு வெளியானது. பிரஷாந்த் நீல் இயக்கியிருந்தார். 

கேஜிஎஃப் படத்தின் 2-ம் பாகம் தற்போது வெளியாகியுள்ளது. யாஷ், சஞ்சய் தத், ரவீனா டாண்டன், பிரகாஷ் ராஜ் போன்றோர் நடித்துள்ளார்கள். கேஜிஎஃப் 2 படம் கன்னடம், தமிழ், ஹிந்தி, தெலுங்கு, மலையாளம் ஆகிய மொழிகளில் வெளியாகியுள்ளது. 

கேஜிஎஃப் 2 படம் முதல் நாளன்று ரூ. 134.5 கோடி வசூலித்து அனைவரையும் ஆச்சர்யப்படுத்தியது. 

மேலும், இதன் ஹிந்திப் பதிப்பு புதிய சாதனையைப் படைத்து வருகிறது. இதற்கு முன்பு 2019-ல் ஹிருத்திக் ரோஷன், டைகர் ஷெராஃப் நடிப்பில் சித்தார்த் ஆனந்த் இயக்கிய வார் படம், முதல் நாளன்று ரூ. 51.60 கோடி வசூலித்ததே சாதனையாக இருந்தது. கேஜிஎஃப் 2 ஹிந்திப் பதிப்பு அதன் சாதனையை உடைத்து முதல் நாளன்று ரூ. 53.95 கோடி வசூலித்து புதிய வரலாறு படைத்தது. 

கேஜிஎஃப் 2 படம் தற்போது இன்னொரு சாதனையை நிகழ்த்தியுள்ளது. இதன் ஹிந்திப் பதிப்பு ஐந்து நாள்களில் ரூ. 200 கோடி வசூலைத் தாண்டியுள்ளது. நேற்று வரை கேஜிஎஃப் 2 ஹிந்திப் பதிப்பு மட்டும் இந்தியாவில் ரூ. 220 கோடியை வசூலித்துள்ளது. பாகுபலி 2 படம் ஆறாவது நாளன்று தான் இந்தியாவில் இந்த இலக்கை எட்டியது. ஆனால் கேஜிஎஃப் 2 ஐந்தாவது நாளிலேயே ரூ. 200 கோடி இலக்கை எட்டி புதிய சாதனையை நிகழ்த்தியுள்ளது. 

மேலும் கேஜிஎஃப் 2 படம் முதல் நான்கு நாள்களில் உலகளவில் ரூ. 546 கோடி வசூலித்ததாகப் படத்தயாரிப்பு நிறுவனம் அதிகாரபூர்வமாக அறிவித்துள்ளது.