மூன்று முடிச்சு தொடரில் இணைந்த நடிகை சஹானா!

சன் தொலைக்காட்சியில் ஒளிபரப்பாகி வரும் மூன்று முடிச்சு தொடரில் நடிகை சஹானா இணைந்துள்ளார்.

திங்கள் முதல் சனிக்கிழமை வரை இரவு 8.30 மணிக்கு மூன்று முடிச்சு தொடர் ஒளிபரப்பாகி வருகிறது. இந்தத் தொடரில் ஸ்வாதி கொண்டே நாயகியாகவும், நியாஸ் கான் நாயகனாகவும் நடித்து வருகின்றனர்.

மேலும் இந்தத் தொடரில் பாரதிராஜாவின் தம்பி தேனி முருகன், ப்ரீத்தி சஞ்சீவ், பிரபாகரன் உள்ளிட்டோர் நடித்து வருகின்றனர். இந்தத் தொடரை, தென்னவன் படத்தை இயக்கிய நந்தன் சி முத்தையா இயக்கி வருகிறார்.

கிராமத்தில் தந்தையுடன் வளர்ந்த பெண், கோடீஸ்வர குடும்பத்தைச் சேர்ந்த நாயகனை திருமணம் செய்துகொள்ளும் சூழல் ஏற்படுகிறது. அதன்பிறகு, அந்தக் குடும்பத்தில் நாயகி தனது கணவருடன் சேர்ந்து சந்திக்கும் சவால்களை மையமாக வைத்து மூன்று முடிச்சு தொடர் ஒளிபரப்பாகி வருகிறது.

இந்த நிலையில், மூன்று முடிச்சு தொடரில் நடிகை சஹானா நடித்து வருகிறார்.

யார் இந்த சஹானா?

நிகழ்ச்சி தொகுப்பாளராக சின்ன திரையில் அறிமுகமான சஹானா, பகல் நிலவு தொடரில் நடித்து மக்கள் மத்தியில் பிரபலமானார்.

தொடர்ந்து, சுந்தரி நீயும் சுந்தரன் நானும், அழகு, உயிரே, கண்ணான கண்ணே, தாலாட்டு உள்ளிட்ட தொடர்களில் நடித்திருந்தார்.

தற்போது, மூன்று முடிச்சு தொடரில் இணைந்துள்ளார்.