ஜம்மு பேருந்து நிலையத்தில் 7 கிலோ வெடிபொருள் கண்டெடுப்பு

ஜம்மு: ஜம்மு பேருந்து நிலையத்தில் ஞாயிறு காலை 7 கிலோ வெடிபொருள் கண்டெடுக்கப்பட்ட சம்பவம் அதிர்ச்சியலைகளை ஏற்படுத்தியுள்ளது.

தெற்கு காஷ்மீரின் புலவாமா மாவட்டத்தில் கடந்த 2019-ஆம் ஆண்டு பிப்ரவரி 14-ஆம் தேதியன்று பயங்கரவாதிகள் நடத்திய வெடிகுண்டு தாக்குதலில் 40 துணை ராணுவப் படையினர் கொல்லப்பட்டனர்.

அந்தத் தாக்குதலில் இரண்டாம் ஆண்டு நினைவு தினம் இன்று அனுசரிக்கப்படும் நேரத்தில், பயங்கரவாதிகள் மீண்டும் தாக்குதல் நடத்தலாம் என்று காவல்துறைக்கு ரகசிய தகவல் கிடைத்தது. இதையடுத்து அவர்கள் மேற்கொண்ட தீவிர சோதனையில் ஜம்மு பேருந்து நிலையத்தில் ஞாயிறு காலை 7 கிலோ திறன் மேம்படுதப்பட்ட வெடிபொருள் கண்டெடுக்கப்பட்டது.

தினமும் நூற்றுக்கணக்கானோர் பயன்படுத்தும் அந்த பேருந்து நிலையத்தில் தகுந்த சமயத்தில் வெடிபொருள்  கண்டெடுக்கப்பட்டதன் மூலம் மிகப் பெரிய விபரீதம் தவிர்க்கப்பட்டுள்ளது.

அது மிகுந்த ஆபத்தை விளைவிக்கக் கூடிய வெடிபொருள் என்றும், தற்போது அந்தப்பகுதியில் கூடுதல் படைகள் குவிக்கப்பட்டு சோதனைகள் நடைபெற்று வருவதாக காவல்துறை உயர் அதிகாரி ஒருவர் தெரிவித்தார்.