அமைச்சா்களின் குடியிருப்புகளை சீரமைக்க ரூ. 92.35 கோடி: மத்திய அரசுக்கு எதிா்க்கட்சிகள் கண்டனம்

மத்திய அமைச்சா்களின் அதிகாரபூா்வ குடியிருப்புகளை சீரமைக்க கடந்த நிதி ஆண்டில் ரூ.92.35 கோடி செலவிடப்பட்டதற்கு காங்கிரஸ், ஆம் ஆத்மி மற்றும் கரப்பான்பூச்சி ஜனதா கட்சி (சிஜேபி) கண்டனம் தெரிவித்தது.

தகவல் அறியும் உரிமை (ஆா்டிஐ) சட்டத்தின்கீழ் பிடிஐ நிறுவனம் பெற்ற தகவலின்படி தில்லியில் உள்ள மத்திய அமைச்சா்களின் அதிகாரபூா்வ குடியிருப்புகளை சீரமைக்க 2014-15-இல் ரூ.27.47 கோடி செலவிடப்பட்ட நிலையில், 2025-26-இல் ரூ.92.35 கோடியாக அதிகரித்தது தெரியவந்தது.

இதைச் சுட்டிக்காட்டி காங்கிரஸ் சமூக ஊடகப் பிரிவுத் தலைவா் சுப்ரியா ஸ்ரீநதே வெளியிட்ட எக்ஸ் வலைதளப் பதிவில், ‘கடந்த பத்தாண்டுகளில் மத்திய அமைச்சா்களின் குடியிருப்புகளில் மேற்கொள்ளப்படும் பராமரிப்பு பணிகளுக்கான தொகை மூன்று மடங்கு அதிகரித்துள்ளது.

பணவீக்கம், வேலையின்மை என பொது மக்கள் பல்வேறு இன்னல்களைச் சந்தித்து வரும் நிலையில் அதை கண்டுகொள்ளாமல் மத்திய அரசு வீணாக செலவு செய்வதா?’ என கேள்வியெழுப்பினாா்.

ஆம் ஆத்மி கட்சியைச் சோ்ந்தவரும் முன்னாள் அமைச்சருமான சோம்நாத் பாா்தி வெளியிட்ட எக்ஸ் வலைதளப் பதிவில், ‘தில்லி முன்னாள் முதல்வரின் அதிகாரபூா்வ இல்லத்தை மறுசீரமைத்தபோது விமா்சித்த ஊடகங்கள் தற்போது அமைதி காப்பது ஏன்’ என கேள்வியெழுப்பினாா்.