'இந்திய வளர்ச்சி விகிதம் 1 சதவிகிதத்துக்கும் குறைவாக இருக்கும்!'

லண்டன்: 2020 ஆண்டில் இந்தியா, சீனா ஆகிய இரு நாடுகளின் வளர்ச்சி விகிதமும் ஒரு சதவிகிதத்துக்கும் குறைவாகவே இருக்கும் என்று ஃபிட்ச் ரேட்டிங்ஸ் நிறுவனம் கணித்துள்ளது.

கரோனா வைரஸ் தொற்று காரணமாக உலகம் முழுவதும் ஊரடங்கு உள்ளிட்ட கட்டுப்பாடுகள் கடைப்பிடிக்கப்பட்டு வரும் நிலையில் புதிதாக, உலகளாவிய பொருளாதார கணிப்புகளை ஃபிட்ச் ரேட்டிங்ஸ் நிறுவனம் வெளியிட்டிருக்கிறது.

புதிதாகக் கிடைக்கும் தரவுகளின் அடிப்படையில் கணக்கிட்டால் இந்தியாவின் மொத்த உள்நாட்டு உற்பத்தி ஒரு சதவிகிதத்துக்கும் குறைவாகவே இருக்கும் என்று ஃபிட்ச் ரேட்டிங்ஸ் தெரிவித்துள்ளது. 

இந்தியா, சீனா இரு நாடுகளிலுமே இதுதான் நிலைமை, 1980-க்குப் பிறகு இத்தகைய நிலை ஏற்பட்டிருக்கிறது.

இரண்டாம் உலகப் போருக்குப் பின் எப்போதுமில்லாத அளவில், உலகளவிலான மொத்த பொருளாதார உற்பத்தியும்கூட 3.9 சதவிகிதம் குறையும் என எதிர்பார்க்கப்படுகிறது என்று ஃபிட்ச் ரேட்டிங்ஸ் முதன்மைப் பொருளியலாளர் பிரையன் கூல்ட்டன் தெரிவித்துள்ளார்.

மெக்சிகோ, பிரேசில், ரஷியா, தென் ஆப்பிரிக்கா, துருக்கி ஆகிய நாடுகளின் மொத்த உள்நாட்டு உற்பத்தியளவில் பெரும் மாற்றங்கள் இருக்கும் என்றும் தெரிவிக்கப்பட்டிருக்கிறது.