கிரிவலப் பாதையில் காபி கடைக்கு சீல் வைக்க உத்தரவு

திருவண்ணாமலை கிரிவலப் பாதையில் உள்ள காபி கடைக்கு சீல் வைக்க வருவாய்த்துறை மற்றும் காவல்துறை அதிகாரிகளுக்கு உயர் நீதிமன்றம் உத்தரவிட்டுள்ளது. 
திருவண்ணாமலை கிரிவலப் பாதையில் பாலி தீர்த்தம் அருகே இருந்த கோயிலை இடித்து விட்டு, அந்த இடத்தை ஆக்கிரமிப்பு செய்து கும்பகோணம் காபி கடை நடத்துவதாக சென்னை உயர் நீதிமன்றத்தில் சிவபாபு என்பவர் வழக்கு தொடர்ந்தார். இந்த வழக்கு, நீதிபதிகள் ஆர்.மகாதேவன் மற்றும் பி.டி.ஆதிகேசவலு ஆகியோர் அடங்கிய அமர்வில் காணொலிக் காட்சி மூலம் விசாரணைக்கு வந்தது. அப்போது, திருவண்ணாமலை மாவட்ட காவல்துறை துணை கண்காணிப்பாளர் அண்ணாதுரை ஆஜராகி, வழக்கு தொடர்பான அறிக்கையை தாக்கல் செய்தார்.இதனையடுத்து வழக்கை விசாரித்த நீதிபதிகள், கிரிவல பாதையில் கோயிலை இடித்து கட்டப்பட்டுள்ள காபி கடைக்கு சீல் வைக்க, வருவாய்த்துறை மற்றும் காவல்துறைக்கு உத்தரவிட்டு விசாரணையை இரண்டு வார காலத்துக்கு ஒத்திவைத்தனர்.