சர்வதேச பாட்மிண்டன் தரவரிசை: டாப்-10 இல் இருந்து வெளியேறினார் சாய்னா

சர்வதேச பாட்மிண்டன் தரவரிசையின் மகளிர் ஒற்றையரில் இந்திய வீராங்கனை சாய்னா நேவால் 11-ஆவது இடத்துக்கு தள்ளப்பட்டார்.

சர்வதேச பாட்மிண்டன் தரவரிசை பட்டியல் வியாழக்கிழமை வெளியிடப்பட்டது. இதில், மகளிர் ஒற்றையர் தரவரிசையில் இந்திய வீராங்கனை சாய்னா நேவால் 1 இடம் சறுக்கி 11-ஆவது இடத்துக்கு தள்ளப்பட்டார்.

சீனாவில் நடைபெற்ற பாட்மிண்டன் உலக சாம்பியன்ஷிப் காலிறுதி சுற்றில் சாய்னா நேவால் தோல்வியடைந்தார். இந்த தோல்வியின் காரணத்தால் தான் சாய்னா நேவால் பாட்மிண்டன் தரவரிசையில் பின்னடைவை சந்தித்துள்ளார்.        

மற்றொரு இந்திய வீராங்கனையான பி.வி.சிந்து பாட்மிண்டன் உலக சாம்பியன்ஷிப்பில் வெள்ளிப்பதக்கம் வென்றதையடுத்து, தொடர்ந்து 3-ஆவது இடத்திலேயே நீடிக்கிறார். 

மகளிர் ஒற்றையர் தரவரிசையின் முதலிரண்டு இடங்களில் முறையே சீன தைபே வீராங்கனை தை ட்ஸூ மற்றும் ஜப்பான் வீராங்கனை அகானே யமாகுச்சி உள்ளனர். 

ஆடவர் ஒற்றையர் தரவரிசையில், இந்திய வீரர் கிடாம்பி ஸ்ரீகாந்த் 2 இடங்கள் சறுக்கி 8-ஆவது இடத்தில் உள்ளார். மற்றொரு இந்திய வீரர் ஹெஎச்.எஸ். பிரணாய் 11-ஆவது இடத்திலேயே நீடிக்கிறார். ஆடவர் இரட்டையர் தரவரிசையில் சாத்விக் சாய்ராஜ் ராங்கிரெட்டி மற்றும் சிராக் செட்டி 2 இடங்கள் முன்னேறி 23-ஆவது இடத்தில் உள்ளனர். மகளிர் இரட்டையர் தரவரிசையில் இந்திய ஜோடி ஏதும் டாப் - 20 இல் இடம்பெறவில்லை. 

கலப்பு இரட்டையர் பிரிவில் பிரணவ் ஜெர்ரி சோப்ரா மற்றும் என்.சிக்கி ரெட்டி 2 இடங்கள் பின்தங்கி 24-ஆவது இடத்தில் உள்ளனர்.