தமிழக வீரர்கள் சாதனை: ஸ்டாலின் வாழ்த்து

சென்னை:  இந்தோனேஷியாவில் நடைபெற்று வரும் ஆசிய விளையாட்டுப் போட்டிகளில் வெற்றி பெற்று சாதனை படைத்த  தமிழக வீரர்களுக்கு திமுக தலைவர் மு.க.ஸ்டாலின் வாழ்த்துத் தெரிவித்துள்ளார்.
 இது தொடர்பாக அவர் வியாழக்கிழமை வெளியிட்டுள்ள வாழ்த்துச் செய்தி:  இந்தோனேஷியாவில் நடைபெற்று வரும் 18-ஆவது ஆசிய விளையாட்டு போட்டியில் தொடர்ந்து பதக்கங்களை வென்று வரும் இந்திய வீரர்கள் அனைவருக்கும் திமுக சார்பில் வாழ்த்துகளையும், பாராட்டுகளையும் தெரிவித்துக் கொள்கிறேன். அதில், தமிழகத்தைச் சார்ந்த வீரர்களும் வெற்றி வாகை சூடி வெள்ளி மற்றும் வெண்கலப் பதக்கங்களை வென்றிருப்பது மகிழ்ச்சி அளிக்கிறது.
  குறிப்பாக, 4 ஷ் 400 மீட்டர் கலப்பு தொடர் ஓட்டப்  போட்டியில் தமிழகத்தைச் சேர்ந்த ஆரோக்கிய ராஜீவ் வெள்ளிப் பதக்கமும்,  400 மீட்டர் ஆடவருக்கான தடை தாண்டும் ஓட்டப்போட்டியில் தருண் அய்யாசாமி வெள்ளிப்பதக்கத்தையும் வென்றுள்ளனர். ஆண்களுக்கான ஒற்றையர் பிரிவு ஸ்குவாஷ் போட்டியில் தமிழகத்தைச் சேர்ந்த சவுரவ் கோஷல் வெண்கலப் பதக்கமும்,  டென்னிஸ் ஆடவர் ஒற்றையர் பிரிவில் பிரஜ்னேஷ் குணேஸ்வரன் வெண்கலப் பதக்கத்தையும் வென்று பெருமை சேர்த்திருக்கிறார்கள். 
 ஸ்குவாஷ் போட்டிகளில் வெண்கலப் பதக்கங்களை வென்றிருக்கும் தீபிகா கார்த்திக்,
ஜோஷ்னா சின்னப்பா ஆகியோருக்கும் திமுக சார்பில் வாழ்த்துகளையும், பாராட்டுக்களையும் தெரிவித்து சர்வதேச அளவிலான போட்டிகளில் மென்மேலும் பல பதக்கங்ளை வாங்கிக் குவித்து தமிழகத்துக்கும், இந்தியாவுக்கும் பெருமை சேர்க்க வேண்டும் என்று வாழ்த்துகிறேன்.