'துப்பாக்கிச்சூடு சம்பவம்: ஜூன் 30 வரை பிரமாண வாக்குமூலம் அளிக்கலாம்'

தூத்துக்குடி துப்பாக்கிச்சூடு சம்பவம் தொடர்பாக இம்மாதம் 30 -ஆம் தேதிவரை பொதுமக்கள் உள்ளிட்டோர் பிரமாண வாக்குமூலம் அளிக்கலாம் என அறிவிக்கப்பட்டுள்ளது.
இதுகுறித்து, இந்தச் சம்பவம் தொடர்பான ஒருநபர் விசாரணை ஆணையம் வெளியிட்ட செய்திக்குறிப்பு:
தூத்துக்குடியில் கடந்த 22 -ஆம் தேதி நடைபெற்ற ஸ்டெர்லைட் தாமிர உருக்காலைக்கு எதிரான போராட்டத்தில் பாதிக்கப்பட்டவர்கள், பொதுமக்கள், சமூக ஆர்வலர்கள் ஆகியோர் போராட்ட சம்பவங்கள் குறித்து மனுக்கள், பிரமாண வாக்குமூலத்தை இம்மாதம் 30 -ஆம் தேதிவரை அளிக்கலாம்.
தூத்துக்குடி தெற்குக் கடற்கரைச் சாலையில் உள்ள விசாரணை ஆணைய முகாம் அலுவலகம், சென்னை பி.எஸ். குமாரசாமி ராஜா சாலையில் உள்ள ஒரு நபர் விசாரணை ஆணைய அலுவலகத்தில் பிரமாண வாக்குமூலம் அளிக்கலாம். மேலும், விவரங்களுக்கு, 044 - 2495 8185, 0461 - 2321729 என்ற தொலைபேசி எண்களில் தொடர்பு கொள்ளலாம்.
விசாரணை ஆணையத்தில் பெறப்படும் அனைத்து மனுக்கள், பிரமாண வாக்குமூலம் தொடர்பாக, குறிப்பிட்ட நாளில் சம்பந்தப்பட்டோரிடம் நேரடியாகவோ, மறைமுகமாகவோ விசாரணை செய்து தகவல் பெறப்படும் என அதில் தெரிவிக்கப்பட்டுள்ளது.