திருத்தணியில் 107 டிகிரி வெயில்

திருவள்ளூர் மாவட்டம், திருத்தணியில் செவ்வாய்க்கிழமை அதிகபட்சமாக 107 டிகிரி வெப்பநிலை பதிவானது.
இதுகுறித்து சென்னை வானிலை ஆய்வு மைய அதிகாரி செவ்வாய்க்கிழமை கூறியது:
தமிழகத்தில் ஓரிரு இடங்களில் அடுத்த 24 மணி நேரத்தில் மழையோ அல்லது இடியுடன்கூடிய மழையோ பெய்ய வாய்ப்பு உள்ளது. சென்னையில் வானம் ஓரளவு மேகமூட்டமாகக் காணப்படும். ஒரு சில இடங்களில் லேசான மழையோ அல்லது இடியுடன் கூடிய மழையோ பெய்ய வாய்ப்பு உள்ளது.
செவ்வாய்க்கிழமை காலை 8.30 மணி வரையிலான கடந்த 24 மணி நேரத்தில் அதிகபட்சமாக, நீலகிரி மாவட்டம் தேவாலா, நடுவட்டம், தேனி மாவட்டம் பெரியாறு, கோவை மாவட்டம் சின்னக்கல்லாறு, கன்னியாகுமரி மாவட்டம் குளச்சல் ஆகிய இடங்களில் தலா 30 மி.மீ மழை பதிவானது. கன்னியாகுமரி மாவட்டம் நாகர்கோவில், மைலாடி, இரணியல், நீலகிரி மாவட்டம் குந்தாபாலம், விழுப்புரம் மாவட்டம் மைலம் ஆகிய இடங்களில் தலா 20 மி.மீ. மழை பதிவானது என்றார் அவர்.
திருத்தணியில் 107 டிகிரி வெயில்: தமிழகத்தில் பல்வேறு இடங்களில் செவ்வாய்க்கிழமை வெப்பநிலை அதிகரித்து காணப்பட்டது. அதிகபட்சமாக திருத்தணியில் 107 டிகிரி வெப்பநிலை பதிவானது. நாகை, தூத்துக்குடியில் தலா 102 டிகிரியும், சென்னை நுங்கம்பாக்கம், மீனம்பாக்கம், மதுரை விமானநிலையம், வேலூரில் தலா 100 டிகிரியும் 
திருச்சி, பரங்கிபேட்டை, கடலூரில் தலா 99 டிகிரியும் வெயில் பதிவானது.